IA-p tatiginnikkunnaarnissamik siunnersuutaa itigartitaasoq
Inuit Ataqatigiit Inatsisartut sisamanngornermi ataatsimiinneranni siunnersuutigaat, aalisarnermut naalakkersuisumut, Nikkulaa Jeremiassenimut tatiginnikunnaarluni taasisoqassasoq.
Tamannali Inatsisartut siulittasuata itigartippaa oqarluni, siunnersuummik taama ittumik qulequttap arlarluinaap oqallisigineqarnerani saqqummiussaqarnissaq malittarisassanik malinninnerunngitsoq.
Tatiginnikkunnaarnissamik siunnersuuteqarneq Issittup Imartaata qeqqani aalisarneq pillugu isumaqatigiissummik Kunngeqarfiup Danmarkip atuutsitsilernissaata nunatsinniit akuerineqarnissaanik oqallinnermi pivoq. Isumaqatigiissut Issittup imartaata qeqqani malittarisassaqanngitsumik aalisannginnissamut tunngavoq.
Inuit Ataqatigiit isumaat malillu naalakkersuisoq piujuartitsisumik aalisartoqarnersoq aalisartoqannginnersorluunniit paasissutissanik eqqunngitsunik ataasiaannarani saqqummiussaqartarsimavoq.
IA ilaatigut isumaqarpoq, aalisarnermut naalakkersuisoq Aalisarnermut, Piniarnermut Nunalerinermullu Ataatsimiititaliamut aalisapiluttoqanngitsoq qaleraliniarneq pillugu inassuteqaatit suliarineqarnerannut atatillugu nalunaarsimasoq.
- Sermitsiami 15. februarimi allassimasumi atuarneqarsinnaavoq, Naalakkersuisoq ”nassuerpoq, Avannaani qaleralinniarnermi qaleraleqassuseq navianartumi inissisimaleqqajaasoq.” Aamma, ulloq 4. februar, § 37 naapertorlugu Inatsisartunut ilaasortamut Aqqaluaq B Egedemut akissuteqaammi ilisimatitsissutigaa, taama Inuit Ataqatigiit tatiginninnginnermut tunngavilersuutiminni allapput.
Kisianni Inatsisartut siulittaasuata, Vivian Motzfeldtip tatiginninnginnermik taasititsisoqassanngitsoq ataatsimiinnerup unikkallatsiareernerani aalajangerpaa, taasititsineq immikkoortumut oqaluuserineqartumut attuumassuteqanngimmat.
