TAKSØEP NALUNAARUSIAA Inuit Ataqatigiit Taksøep nalunaarusiaa nuannaarutigaat

Taksøep nalunaarusiaani innersuussutigineqartut Inuit Ataqatigiinnit akuersaarneqartut, partiimi siulittaasup, Sara Olsvigip oqaatigaa.

- Soqutiginartunik imaqarpoq. Nuannaarutigaarpullu uani sammineqartut annertuumik Issittumut tunngasut tigussaasumik innersuussuteqarfigimmatigit, Sara Olsvig oqarpoq.

Aamma atuaruk Vittus: Taksøep nalunaarusiaa annilaarnarpoq

Inuit Ataqatigiit naalagaaffeqatigiit nunanut allanut politikkissaanni pingaaruteqartutut tikkuagaasa ilaat nalunaarusiami innersuussutigineqartut, Inuit Ataqatigiit siulittaasuata oqaatigaa.

- Soorlu illersornissamut, Nunatta suliassaqarfimmut peqataanerunissaa. Soorlu innuttaasut namminneq kajumisutsiminnik upalungaarsimanikkut suleqataanissaat tassani tikkuarneqarpoq. Taava qaammataasanik Nunatta nakkutigineqarnera, taassumalu annertunerusumik suliarineqartariaqarnera, taavalu aamma Issittumi, sillimaniarneq eqqarsaatigalugu nunat akornanni suleqatigiittoqarnerunissaa, taanna aamma tikkuarpaa, Sara Olsvig oqarpoq.

Aamma atuaruk Qujaukitsup naalagaaffeqatigiinnermi kissaatini saqqummiuppai

Taamaattoq nalunaarusiap sananeqarnerata aallartinneraniinnaq Nunatsinnit peqataatitsisoqarsimasoq, Sara Olsvigip uparuarpaa. Tamannalu siunissami aaqqinneqartariaqartoq, taanna isumaqarpoq.

- Maluginiarparput, Nunatsinnit toqqaannartumik peqataasoqanngimmat. Nunatsinniimmat soorunami ataatsimeeqatigaarput, aamma Inatsisartuni ataatsimiititaliami, kisianni suliap ingerlanerani ataavartumik Nunatsinniit peqataasoqarsimannginnera uggoralutigu Inuit Ataqatigiinnit nalunaarutigereernikuuarput, Inuit Ataqatigiit siulittaasuat, Sara Olsvig oqarpoq.

Aamma atuaruk TAKSØEP NALUNAARUSIAA Issittumut tunngasut uani atuakkit