IA-p mittarfiit pillugit pilersaarutai Kiistap toqqissisimanartinngikkai
Qaqortumi mittarfittaassap tikikkuminassusiata misissorneqaqqaarnisssaa pillugu mittarfissaq kingorna aatsaat sanaartorneqalissasoq, Inuit Ataqatigiit siunnersuutigaat.
Qaqortumili piaarnerpaamik mittarfiliortoqartariaqartoq, Kiista P. Isaksenip oqaatigaa, kujataanilu inuussutissarsiorneq pillugu isumasioqatigiittoqaqqammernera innersuussutigalugu:
- Kipiluttunartorujussuuvoq taamatut inissisimaneq, ilaatigut isumasioqatigiinnermi ulluni kingullerni maani ingerlatatsinnik kisitsisit takutippaat, ullumikkutut ingerlatsiinnartoqarpat innuttaasut ukiut qulit aqqaneq-marlullu missaasa iluanni 1000-inik ikileriaqqittussaassasugut, Kommune Kujallermi borgmesteri Kiista P. Isaksen taama oqarpoq.
AAMMA ATUARUK Palle Jerimiassenip IA-p siunnersuutaa ileqimisaassutigigaa
Inuit Ataqatigiit siunnersuutaat naapertorlugu tulleriiaarinikkut mittarfiliortitertoqassaaq, Nuummi mittarfiup tallineqarnissaata siulliunneqarnissaa siunnersuutigineqarluni, Ilulissanilu mittarfiup kingorna tallineqarnissaa siunnersuutigineqarluni.
- Inuit Ataqatigiit saqqummiussinermini kingulliussasugut oqaatigineqarpoq, Nuuk salliutinneqarluni. Aamma ukiuliisoqanngilaq qaqugukkut naatsorsuutigissaneripput. Takissusissaa aamma taaneqanngilaq taanna toqqissisimanarinngiivippara, Kiista P. Isaksen taama oqarpoq.
Kujataani Qaqortumi mittarfiup taasissutigineqannginnerani sukumiinerusumik misissuiffigineqarnissaa partiip tassa kissaatigaa. Sara Olsvigip oqaatigaa mittarfiup tikikkuminassusiata 80 procentiunera Inuit Ataqatigiinnut naammanngitsoq.
AAMMA ATUARUK IA: Nuummi mittarfik siulliunneqassaaq Kangerlussuarlu ineriartortinneqarluni
Sara Olsvigilli taama oqarnera Kiista P. Isaksenip paasiuminaatsippaa, misissuisoqareersormi, taassuma oqaatigaa:
- Misissuisoqareerpoq, aamma immikkut ilisimasallit innersuussinerat taakkua tutsuiginartutut uanga isigivakka, aamma nalilersuinerit ukiorparujussuarnik taamatut inissisimajuarnitsinni pitsaasut iluani inissinniarneqarnitsinni isuamaqarpunga tunngavissat aammalu konsekvensberegninginut tunngasut allarpassuit qiviaraanni tutsuiginartunik peqartugut, Kommune Kujallermi borgmesteri Kiista P. Isaksen taama oqarpoq.
AAMMA ATUARUK Inuussutissarsiutinut aningaasaliineq iluatsitsilluartitsissasoq
