Palle Jerimiassenip IA-p siunnersuutaa ileqimisaassutigigaa

Nuummi mittarfik tallineqareerpat aatsaat Ilulissani mittarfiliortoqarnissaanut Inuit Ataqatigiit siunnersuutaat, Avannaata Kommuniata borgmesteriata Palle Jeremiassenip illuatungilerpaa.

Inuit Ataqatigiit siunnersuutaa Nuummuinnaq iluaqutaassasoq, Avannaata Kommuniani borgmesteri oqarpoq:

- Massakkut piffissanngorpoq naalakkersuisut mittarfiit siunnersuutaat aalajangiusimaneqassasoq. Nunatta pisariaqartippaa, aningaasaliiniartut utaqqipput. Massakkut periarfissaq atorluanngikkutsigu isumaqarpunga nunatsinnut aningaasatigut annaasaqaateqangaatsiassasugut, aammalu suliffinnik nutaanik pilersitsiniarnerput eqqarsaatigalugu. Massakkut periarfissaavoq, massakkorluinnaq nunarput tamaat isigalugu eqqarsarnissaq, Palle Jeremiassen taama oqarpoq.

Inuit Ataqatigiit mittarfiliortiternissat pillugit siunnersuutaat paatsoornermik tunuliaqutaqarunartoq, taanna aamma oqarpoq:

- Mittarfiit sooq allilerneqarniarnersut paatsoorsimarpasippaat. Mittarfiit allilerniarneqarput nunatta aningaasarsiornera pitsanngorsarniarlugu, nunatsinnilu aningaasanik nutaanik pilersitsiniarluni, ))

Avaanaata Kommuniani borgmesteri Palle Jeremiassen taama oqarpoq.

Mittarfiit ataasiakkaarlugit sanaartorneqarnissaat Inuit Ataqatigiit siunnersuutigaat, aningaasat kaaviiaartitat amerlavallaalernerisigut akit aqunneqarsinnaanngitsumik qaffariataarsinnaanissaat kissaatiginnginnamikku. Taamatulli tunngavilersortoqarnera Palle Jeremiassenip akuersaarumanngilaa.

AAMMA ATUARUK IA: Nuummi mittarfik siulliunneqassaaq Kangerlussuarlu ineriartortinneqarluni

Sulisussanik amigaateqartoqarpoq, sulisussanillu nunatta avataaneersunik suli pisariaqartitsisoqartoq, Avannaata Kommuniata borgmesteria oqarpoq:

- Nunaqavissut sanaartornernut atorneqarnissaannut siunnersuut isumaqatiginarpoq, kisianni pissutsit qiviaraani massakkut piviusorsiunngilaq. Massakkut tamatta sanaartornernut sulisussanik ujartuivugut. Sanaartukkat kinguaattooqqapput, soorlu Nuummi anstalti ukiunik marlunnik kinguaattooqqavoq sulisussanik amigaateqarluni. Taamaattumik sanaartornermi avataaniit suliartortussanik atuinissaq sanioqquneqarsinnaanngilaq, Avannaata Kommuniani borgmesteri Palle Jeremiassen oqarpoq.

Kangerlussuup mittarfiata attanneqarnissaa Inuit Ataqatigiit aamma siunnersuutigaat. Tamatuma saniatigut Qaqortup suli mittarfitaarnissaa siunnersuutigineqarpoq, tikikkuminassusaatali misissorneqarnissaa kissaatigineqarluni.

AAMMA ATUARUK Inuussutissarsiutinut aningaasaliineq iluatsitsilluartitsissasoq