IA-p isornartorsiuineranut danskit politikerii akipput
Kalaallit Nunaanni danskit oqartussaaffiinik pitsanngorsaanissamut suliniuteqarnissaq eqqarsaatigalugu danskit folketingimi ilaasortaatitaat kinguuttooqqapput.
Folketingimut ilaasortaq Aaja Chemnitz Larsen partiimilu siulittaasua Sara Olsvig tusagassiuutinut nalunaarumminni taama allapput.
Tamannalu ilumoortortaqartoq Radikalini Nunarput pillugu oqaaseqartartoq Martin Lidegaard nassuerpoq.
- Ilumoortortaqarpoq, Danmarkip suli oqartussaaffigisai pillugit danskit politikeriinit danskinillu naliginnarnit tamakku ukkatarineqanngillat. Akisussaaffiup ilaanik piffissami aggersumi tiguserusuppunga, Lidegaard oqarpoq.
AAMMA ATUARUK Danskit politikerii kalaallit meerartaannik ikiuinissaminnik piareersimapput
Inuit Ataqatigiit danskit politikeriinit ujartugaat tassaaneruvoq eqqartuussiveqarnermut tunngasut soqutigineqarnerunissaat. Soorlu nunaqarfinni tamani kommunefogedeqarnissaa.
Socialdemokratinili nunarput pillugu oqaaseqartartoq Karin Gaardsted isumaqarpoq, danskit politikeriisa suliassat ataasiakkaat namminneq tigusassagaat - aamma danskit Nunatsinni oqartussaaffigigaluarpatigilluunniit.
- Maannakkut oqarsinnaavunga takusinnaagakku suliassaqarfiit ilaasa pitsaanerusumik suliarineqarsimasinnaanerat. Uagulli danskit tungaanniit kommunefogedeqartarneq allanngortissinnaanngilarput, kalaallit inatsisartuinit suleqateqanngikkutta kissaateqarfigineqanngikkuttalu. Tamanna eqqortuusorinngilara.
AAMMA ATUARUK IA-mi assigiinngitsumik oqalupput
Dansk Folkepartiimiilli Søren Espersen isumaqataavoq Kalaallit Nunaanni eqqartuussiveqarnerup tungaatigut kinguaattooqqasoqarmat. Naallu danskit oqartussaaffigigaluaraat pisariaqavinngilaq danskit politikerii tassaassasut pitsanngorsaanissaq eqqarsaatigalugu suliniuteqaqqaartussat, Espersen isumaqarpoq.
- Eqqumiigilaaginnarpara politikerit Folketingimiissimasup maannalu Folketinngimiittup taanna saqqummiummassuk. Allannguutissamik siunnersuutissaqarunik aalajangiiffigisassamik siunnersuuteqarsinnaapput. Nalornisiginngilaralu amerlanerussuteqarluarsinnaasut. Taamaaliortulli tusarsimanngilakka takusimanagilluunniit.
