VIDEO IA-p Demokraatillu amigartoorutissat saqqummiuteqqugaat

Naalakkersuisut 2014-imut missingersuutaat qanoq inissisimappat? Marlunngormat tv-kkut qineqqusaartoqarmat KNR-ip atuisuisa tamanna akissuteqarfigineqarnissaa kissaatigaat.

Vittus Qujaukitsulli inatsisit malittussaallugit oqaatigaa.

- Inuit Ataqatigiit eqqissisarsinnaavakka nunatta aningaasaqarnera ajalusooqqajaanngimmat.

- Maluginiagassarsi tassaaginnarpoq, naatsorsuutigisatsitut isertitassat ikinnerulaarmata. Tamannalu nunatta karsianut sunniuteqassaaq, Vittus Qujakitsullu aningaasaqarnermullu ataatsimiititaliaq ilisimateqqaarlugu kisitsisit innuttaasunut saqqummiussinnaanerarpai.

Aamma atuaruk Tupatortartut imigassartortartullu ikinnerummata nunatta karsia amigartooruteqarpoq

- Inatsisit pisussaaffipput malillugu malippagut. Akisussaaffeqarluta sulivugut. Taamaammat IA-p piumasaqarnera maliinnarlugu kisitsisinik imaaliallaannaq saqqummiussaqarsinnaanngilanga.

- Amigartooruteqassaagut. Tamanna Inatsisartut ukiaanerani ataatsimiinnerisa aallartinnerani siumut ilisimatitsissutigereerparput, tassalu imigassamik tupamillu atuinerup annikillineratigut akileraarutinit isertitat ikinnerusussaasut. Tamatumali saniatigut isertitassatut missingersuutigineqartut allat, ilaatigut avaleraasartuunit, naatsorsuutigisamit ikinnerupput, aningaasaqarnermut naalakkersuisoq oqarpoq.

Oqalleqataasulli ilaasa pingasut, taamatut akissuteqarnera naammaginngilaat.

- Naalakkersuisut ataatsimeeqatigiissimannginnerat utoqqatsissutigalugu paasissutissanik saqqummiussisoqarsinnaannginneranik oqalunneq ikkappallaaqaaq. Tamannami siulittaasup aalajangiineratigut aaqqinneqarsinnaavoq, paasissutissallu toorsineriinnakkut e-mailikkut aningaasaqarnermut ataatsimiititaliamut nassiunneqarsinnaallutik, sekundialuillu qaangiunnerini tusagassiorfinnut ingerlateqqinneqarsinnaallutik. Kinguarsaanissamut pissutissaqanngilaq, aningaasaqarnermut ataatsimiititaliami ilaasortaq Naaja Nathanielsen Inuit Ataqatigiinneersoq taama oqarpoq.

Aamma atuaruk Vittus Qujaukitsoq: Nunatta karsia amigartooruteqassaaq 

- Paaasissutissat qinersisoqannginnera saqqummiunneqarnissaat neriuutigaara, killiffipput qinersisartunit ilisimaneqarniassammat. Qinersisoqannginnerani saqqummiussisoqarnissaa pingaaruteqartutut isigaara, Jacob Abelsen Atassummeersoq oqarpoq.

- Naalakkersuisut isertorniakujuinnarnerat inuiaqatigiit atorsinnaanngilaat. Vittus Qujaukitsoq tatigineqanngilaq, Randi Vestergaard Demokraatineersoq oqarpoq.

Pingasunngornerup unnukkuani saqqummiussissamaartoq
Tamatuma kingorna Vittus Qujaukitsup oqaatigaa ataatsimiititaliaq susassaqartoq ilisimatereerunik aqagu unnukkut tv-kkut nassuiaateqarumaarluni.

- Nunatta aningaasaqarnera ima nukittutigaaq amigartooruteqarsinnaalluni. Tamanna akiliisinnaassutsitta pitsaasumik inissisimaneranik peqquteqarpoq, aningaasaqarnermut naalakkersuisuugallartoq oqarpoq, tamannalu Jacob Abelsenip Atassummeersup eqqissiallaatigaa.

- Tamanna aamma naatsorsuutit 2013-ip naaneerani qanoq inissisimanerannut tunngatillugu isiginiarneqassaaq. Naatsorsuutit nukittuumik inissisimapput, Jacob Abelsen oqarpoq.

Aamma atuaruk GA-p Vittus Qujaukitsoq akissuteqaqqugaa

Demokraatilli Inuit Ataqatigiillu tamanna paasiuminaatsippaat.

- Naalakkersuisuugallaratta (IA-p Demokraatillu 2009-mit 2013-imut naalakkersuisuunerini, aaqq.) missingersuutit iluanni sulinerput pissutigalugu malersorneqartarpugut. Elevatoritullusooq qummut ammullu ingerlasaqattaanngilagut, soorlu tamanna maanna uterfiginiarneqarpasittoq, Justus Hansen Demokraatineersoq taama oqarpoq.

Taamatut oqartoqarmat Vittus Qujaukitsup erseqqissaatigaa, maanna naalakkersuisuusut ivertinneqarmata amigaartoorutit 100 millioniusimasut.

- 100 millioninilli amigartooruteqarneq 77 millioninik sinneqartooruteqarnermut mumisipparput. Taamaammat aningaasaqarnermik ingerlatsisinnaanngitsutut oqaatigineqassanngilagut, Vittus Qujaukitsoq oqarpoq.

Aamma atuaruk Nunatta Karsia amigartooruteqarnersoq ataatsimiititaliami ilaasortaagallartup apeqqutigaa

Aaja Chemnitz Larsenili IA-meersoq kingumut aamma eqqaamasinnaalluarpoq.

- 2009-mi aqutsineq tigugatsigu akiligassaq 500 millionit koruuninik annertutigisoq tiguarput. Isumaqarpunga tikkuartuinnginnermi nammineq iliuuserisimasat isiginiarneqaqqaartariaqartut.

- Naagga, uanga toqqissisimanartinngilara, aamma kisitsisit saqqummiunneqarnissaat pingaaruteqarluinnartutut isigaara. Innuttaasut kisitsisinik saqqummiussiffigineqartariaqarput. Tamannalu piaarnerpaamik pissaaq. Soorunami inatsisit malinneqartussaapput. Qanorli ilungersunartorsiortiginerluta paasisariaqarparput, innuttaasut paasitinneqassallutik pisussaaffigaat, Aaja Chemnitz Larsen oqarpoq.