IA-p ataatsimeersuarnerani siulittaasup tullii qinerneqarput

Inuit Ataqatigiit ilaasortaat ukiuni tulliuttuni pingasuni partiiminni siulittaasup tullianik atuuttussamik ullumi pissanganartumik qinersipput. 

Aasianni ataatsimeersuaarnermi maanna naammassigaluttuartumi tamanna pivoq

Politikkikkut aaqqissuussaanermi siuittaasup tulliatut inissisimasoq Aqqaluaq B. Egede Inatsisartunut ilaasortamik Pipaluk Lyngemit unammillerneqarpoq. 

Siulersuisuunerni kinguaariinnik nutaanik nukinillu nutaanik isertoqarnissaa kissaatigineqaraluartoq, Aqqaluaq B. Egede 33-nik taaneqarluni siulittaasup tulliatut qinerneqarpoq, unammillertaa 15-nik taaneqartoq. 

- Qineqqusaarnissarput assoroornartussaavoq assigiinngitsorpassuarnillu unammillerneqassaagut. Annertuumik iliisimasaqarpugut misilittagaqarluarlutalu, taakkulu pitsaanerusumik ingerlateqqinniartussaavagut. Ilisimariikkattali annaaneqannginnissaat mianersuutissavarput. 

- Allanit taarserneqarsinnaasorinngilanga, Aqqaluaq B. Egede qineqqusaarluni oqalugiaammini taama oqarpoq. 

Agathe Fontainep atuuffigisimasaa qineqqusaarutigineqarpoq

 Ataqatigiissaarinermi siulittaasup tullianik qinersineq allatut ingerlanneqarpoq. 

Atuuffimmik taassuminnga soqutiginnittut marluupput, tassa Naya Sophia Pedersen Lyberth aamma Nivi Heilmann Efraimsen tassunga inissinnissamut soqutiginnipput. 

Ataqatigiissaarinermi siulittaasup tulliusoq Agathe Fontain tunuarniarluni aalajangersimavoq, taamaammallu Naya Sophia Pedersen Lyberth aamma Nivi Heilmann Efraimsen qineqqusaarput. 

Nivi Heilmann Efraimsen 43-nik taaneqarluni qinerneqarpoq, Naya Sophia Pedersen Lyberths 13-inik taaneqartoq.

- Ataqatigiissaarinermi siulittaasup tulliatut sassarpugut pitsammik siunertaqaratta anguniakkagullu anguniarusukkakkit. 

- Inunnik ataatsimoortitsillaqqissuuvunga taamaammallu sassarlunga, Nivi Heilmann Efraimsen qineqqusaarluni taama oqalugiarpoq. 

Siulittaasutut qinerneqaqqippoq

Partiip siulittaasuata Múte B. Egedep siulittaasutut qinerneqaqqinnera tupaallannanngivissumik ingerlavoq. 

Taanna 2018-imi siullerpaamik siulittaasutut qinerneqarpoq, maannalu unammillerteqarani qinerneqaqqilluni. 

Siulittaasorlu tapersersorneqarluartoq ilaasortanit nukuillutik ersaartaaattunik qinerneqarpoq. 

Partiimut siuttutut sulinerminik ingerlatitseqqiinissani pissangagalugu taassuma ippassaq KNR-imut oqaatigaa. 

- Piareersimavunga akisussaaffeqarpunga suliassaqarlungalu, ukiunilu aggersunga Inuit Ataqatigiinni siuttutut ingerlaqqinnssara qilanaaraara.