IA-mit isornartorsiuineq Demokraatit tupigusuutigaat
- Paasissutissat maannamut pigisakka uannut naammapput, Naalakkersuisullu sulinerat tatigilluinnarpara, Justus Hansen oqarpoq.
Oqallinneq taama sivitsoreertigisoq, Naaja Nathanielsen Naalakkersuisunut aatsaat apeqquteqarmat, taassuma tupigusuutigaa.
- Greenpeacep inupiluusernermik periuseqarluni apeqqutinik saqqummiussinerata kingorna politikerit aatsaat apeqqutinik saqqummiussinerat tupigusuutigaara. Apeqqutit taamaattut innuttaasut aammalumi politikerit namminneerlutik saqqummiussinnaagaluarpaat, Justus Hansen oqarpoq.
Naaja Nathanielsenip Naalakkersuisunut apeqquteqarnera kingusinaannginnersoq KNR-imit aperineqarpoq, tassami uuliasiorluni qillerinissanut akuersissutit qangali tunniunneqareermata:
- Taamaassinnaavoq, kisianni aamma oqartoqarsinnaavoq uuliasiorneq pillugu paasisimasaqarnerulernissatta tungaanut tamatuma oqallisigineqarnera ukiualunni suli ingerlajumaartoq. Suut tamarmik aallartiffeqartarput, ilimaginngilaralu qaammatit pingasut matuma siorna oqallisigilersimagaluarutsigu allaanerungaarsimassagaluartoq, Naaja Nathanielsen akivoq.
IA-meersut Juliane Henningsen Olga P. Berthelsenilu Naaja Nathanielsenimik tamakkiisumik tapersiipput, taanna oqarmat, Naalakkersuisut uuliasiorneq pillugu innuttaasunut politikerinullu paasissutissiillaqqippallaarsimanngitsut.
Justus Hansenili isumaqarpoq Naalakkersuisuniit paasissutissiissutit, ilaatigut Ove Karl Berthelsenimit saqqummiunneqartartut, naammattut.
- Nunatsinni pisut taama angitigisut pillugit paasissutissat naammalersinnaanngillat, kisianni qularutiginngilluinnarpara, Naalakkersuisut piffissaagallartillugu naammattumik paasissutissiisassasut, imaanngitsoq paasissutissat soqutaanngikkaluartulluunniit ingerlaannaq saqqummiuttarlugit, Inatsisartuni ilaasortaq Demokratineersoq, Justus Hansen, oqarpoq.
