IA Kujallermi: aatsitassarsiorneq illoqarfimmik piuneerutsitsisinnaavoq
Kommune Kujallermi, borgmesterip Siumumeersup, Jørgen Wæver Johansenip Kuannersuarni uranisiortoqarnissaanik isumaqataanera, Inuit Ataqatigiit sinnerlugit kommunalbestyrelsimi ilaasortat akerleraat.
Allattoq Kerté Jeremiassen
decembarip 03-at 2015 15:24
- Aatsitassarsiorneq taamak assigiinngitsigisumik isummersorfigineqartoq, ajutoortoqarpallu illoqarfimmik piuneerutsitsisinnaasoq, borgmesterimut tullersorti, Avaaraq Olsen tusagassiuutinut allagaqarluni oqarpoq.
Kommune Kujallermi borgmesterip oqaatigaa Kuannersuarni saffiugassanik qaqutigoortunik aatsitassarsiorneq, mingutsitsinngitsumik ingerlanneqarsinnaappat, Kommune Kujallermiit tapersersorneqartoq.
Avaaraq Olsenilli erseqqissaatigaa, Kommune Kujallermi inuussutissarsiornikkut ineriartortitsineq akerlerinnginnamikku, taamaattumillu inuussutissarsiutaasinnaasut allat piaartumik aallarnisaaffigineqartariaqartut, aatsitassat kisiisa piinnanngikkaluarlugit.
