IA: Kim Kielsen oqalugiaammini neriorsuivallaarpoq
Naalakkersuisut siulittaasuat ukiortaami oqalugiaammini neriorsuivallaartoq, Inuit Ataqatigiinneersoq Naaja Nathanielsen aperigaanni akissaaq.
Aamma atuaruk Atassutip ukiortaami oqaaseqaataa
- Isumaqarpunga aalajangersimasumik siunnerfeqanngitsoq. Isumaqarpunga pingaarnersiuineq amigaataasoq. Tunissutissarpassuarnik tunisineq naammanngilaq. Aammali piumasaqaateqartoqartariaqarpoq killormullu; aammali oqaatigisariaqarpoq suut pingaartinniarnerunerlugit.
Kim Kielsen oqalugiaammini aamma ilaatigut oqarpoq- Naalakkersuisooqatigiit isumaqatigiissutaanni eqqaaneqarsimasutut - Kangerlussuarmi umiarsualiviliortoqassasoq, mittarfinnillu nutaanik marlunnik sanasoqassasoq.
Aamma atuaruk Kim Kielsenip ukiortaami oqalugiaataa
Aamma neriorsuutigaa, amerlanerit sulilernissaat anguniarlugu sulinermi ilanngaatip allineqarnissaa.
IA-p ilaatigut tamanna tapersersorpaa:
- IA-miit tamatuma oqallisiginissaanut ammasimavugut, isumaqarpugulli annerusumik akissarsiakinnerusunut tutsittariaqartoq, taamaalilluni sulinissamut kajumissutaasinnaammat, akissarsiakinnerpaallu pissarsitinnerullugit. Isumaqarpunga tamaasa pissarsitissallugit akissaqanngittugut, isumaqarpungalu sunniutissaa neriuutigineqartutut sunniukkunnanngitsoq.
Aamma atuaruk SIK: Naalakkeruisup siulittaasuata oqalugiaataa pitsaalluinnartoq
Aapparisap isertitai apeqqutaatinnagit utoqqaat tamarmik aningaaasateqarnerulernerannik kinguneqartussamik utoqqalinersiutit iluarsartuuteqqinnissaannik Kielsenip siunnersuutaa, IA-p aamma isornartorsiorpaa.
Aningaasaqarnerput iluarsiniarlugu inuiaqatigiinni kikkut pilliuteqarnissaat Naalakkersuisut ataatsimut isigalugu tigussaanerusumik nalunaarutigisariaqaraat, IA oqarpoq
- Inuuniarnikkut atukkat naapertuuttuussagunik qanoq ittuunisaat oqallisigisariaqarpagut, oqarlutalu: Inuiaqatigiinni innutaaqateqarpugut pitsaasunik toqqissisimanartunillu atuagaqartunik. Taava qaaffasissuseq tassunga inissitsigu oqarlutalu: Aap, taavami taakkua pisortanit pissarsiaat annerussanngillat. Aningaasat pigisaagut tunniuttakkavullu sinnilimmik pissaqanngitsunut tunniuttariaqarpagut, Naaja Nathanielsen oqarpoq.