Atassutip ukiortaami oqaaseqaataa

Atassutip siulittaasuata Knud Kristiansenip ukiortaami oqaaseqaatini nassiuppaa. Tassanilu Naalakkersuisooqatigiinnissamut isumaqatigiissut aallaavigineqarpoq assullu eqqartorneqarluni. Partiip siulittaasuata aalisartunut piniartunullu atugassarititaasut killilersorneqannginnerunissaat sulissutiginiarpaa. Inuusuttuttaaq nunarsuarmut aallarlutik misigisassarsioqquai - kingornalu nunatsinnut uterlutik sulinissaannik kaammattorlugit.

Allattoq Helle Nørrelund Sørensen, Tikaajaat Kristensen

januaarip 02-at 2015 13:04

Tupaallannanngitsumik Atassutip pingaartitai soorlu, inuussutissarsiorneq, ilaqutariinneq ilinniartitaanerlu siulittaasup oqaaseqaataani saqqummiunneqarput. Pingaartitat Naalakkersuisut anguniagaanni aamma ilaasut.

Aalisartut piniartullu tunitsivissaat pitsanngorsarniarlugit imartat suli atunngisat misissorlugit aalisakkanik suli iluaqutiginngisanik misissuisoqassaaq - nungusaataanngitsumillu aallaaveqarluni aalisarneq pissaaq, partiip siulittaasuata oqaaseqaataa taama ilaqarpoq.

- Taamaattorli suli aalisakkat iluaqutiginngisagut misissuiffigissavagut. Imartat suli atunngisagut misissorlugit iluaqutigilissavagut. Tamanna angussavarput, sinerissami tunitsiviit matoqqasut ammarnissaannut aqqutissiuussinikkut. Aamma aalisartut angallatimikkut nutarsaanissaannut periarfissiinikkut, Knud Kristiansen oqarpoq.

Aamma atuaruk Kim Kielsenip ukiortaami oqalugiaataa

Inuusuttut aalisartunngornissamik siunertaqartut taama aqqutissiuunneqarsinnaanerarpai.

Piniartut pillugit siulittaasup imminut pilersornissaq eqqaavaa. Kalaaliminernik tunisassiorneq annertusarneqassaaq kalaalimerngit iluaqutiginerusinnaalersillugit. Tamanna piniakkat killilersukkat nalilersoqqinnerisigut pissaaq, Knud Kristiansen isumaqarpoq.

- Taamaasilluta tamatta nerisatigut, pissatigullu, timmissat, kalaalimernillu allat iluaqutigissavagut, oqaaseqaammini oqarpoq.

Meeqqat atuarfiat aaqqissuuteqqissaaq

Kingullertut, minnerunngitsumilli, Knud Kristiansenip meeqqat atuarfiata aaqqissuuteqqinneqarnissaa neriorsuutigaa.

- Aaqqissuusseqqissaagut meeqqat atuarfianni skolefe-nik pilersitsinikkut, siunnersortinik pilersitsinikkut, aammalu 11. Klasse-p neqeroorutitut atuutilerneratigut. Taamaasiornikkut meerartatta ilisimasassatigut piginnaasatigullu nukittullutik periarfissallu tamaasa pigalugit meeqqat atuarfiat naammassisassagaat anguniassavarput, Atassutip siulittaasua Knud Kristiansen oqarpoq.

Ilinniarnerlu Kalaallit Nunaata avataani ingerlanneqarsinnaavoq - ataatsimilli piumasaqaatitaqarpoq:

- Taamaattumik inuusuttut nunarsuarmioqatitsinnut aallarluni misigisassarsioritsi! Ilikkakkasi nassarlugit nunatsinnut uterlusi sulligitsi! Taava nunat ikiussavat, Atassutip siulittaasua Knud Kristiansen ukiortaami oqaaseqaammini taama kaammattuivoq.