IA: KANUKOKA aggulunneqassanngilaq
Qaasuitsup Kommuniani Inuit Ataqatigiit gruppeformandiata Bendt B. Kristiansenip ajuusaarutigaa, KANUKOKA-p siunissami sumi inissisimanissaa pillugu oqallinnermi kommunalbestyrelse tigussaasunik suli saaffigineqarsimanngimmat.
Taamaattumik oqallinneq sukumiisumik akuliuffigiuminaappoq, Bendt B. Kristiansen tusagassiuutinut nalunaaruteqarluni taama allappoq.
- Qaasuitsup Kommuniani Inuit Ataqatigiit isumaqarpugut KANUKOKA ataasiusoq suli pisariaqartoq. KANUKOKA aggululluni inissinneqassappat sanngiinnerulernermik kinguneqassaaq, tamanna kommunit pingasuusunut nukittunerulersitsiunnanngilaq, Kristiansen allappoq.
Aamma atuaruk Palle Jeremiassen: KANUKOKA-p aggulunneqarnissaa isumatusaarnerunngilaq
Taama oqaaseqaateqartoqarpoq, KANUKOKA-p siulersuisuini amerlanerussueqartut, aviisip AG-ip allaaserisaa naapertorlugu, kommunit kattuffiata allaffeqarfia kommuuninut ilaasortaasunut sinneruttunut pingasunut avillugu inissinneqassasoq, Kommuneqarfik Sermersuup ukiup nikinnerani ilaasortaajunnaarnerata kingorna.
Bendt B. Kristiansenip erseqqissaatigaa, akisussaaffiit annertuut kommuninut nussorneqartussat pineqarmata taamaattumik KANUKOKA kommuninut tamanut katersuuffiussasoq siunnersorneqarneq sullinneqarnerlu pitsaasoq qaffasissorlu kissaatigineqarmat.
Kissaatigaarput KANUKOKA-p aaqqissuussaanera allanngortinneqartariaqartoq, siulersuisulerneqartariaqartorlu borgmester-init aqunneqanngitsumik, kommunilli sisamat soqutigisaat ataatsimut isigalugit sullissiniartussanik, Qaasuitsup Kommuniata kommunalbestyrelseani IA-mi gruppeformandi taama oqarpoq.