Palle Jeremiassen: KANUKOKA-p aggulunneqarnissaa isumatusaarnerunngilaq
- Kommunit kattuffiat pingasunngorluni avissaguni sanngiillinissaa aammalu ataqatigiissarneqarnissaa ajornakusoortorujussuartut isigaara aamma KANUKOKA-p ingerlariaqqissaguni kivitseriarsinnaanera annikillissammat tamanna isumaqatiginngilara, KANUKOKA-mi siulittaasoq Palle Jeremiassen taama oqarpoq.
Aamma atuaruk KANUKOKA-p allaffeqarfia Nuummiikkunnaassaaq
KANUKOKA-mi siulittaasup tullia siulleq Ole Mølgaard-Motzfeldt, Kommune Kujalleq, KANUKOKA-p pingasunngorlugu avinneqarnissaanut oqaaseqarniarnani ullumi oqarpoq, siulittaasup tulliata aappaa Kelly Berthelsen, Kommune Kujalleq, kattuffiup aggulunneqarnissaa pillugu isummani sapaatip akunnerata tulliani aalajangissavaa, erseqqissaatigaalu KANUKOKA-p maannakkut atuuffia iluaqutaalu aallartitat sapaatip akunnerata tulliani ataatsimiinneranni oqaluuserineqartariaqartutut isumaqarfigalugu.
Taassuma siunnersuutigaa, KANUKOKA-mi inatsisileritooq siunnersortitut atorfeqartinneqartoq kommunit arlaannut nuunneqarsinnaasoq, kommuninili atorfillit akissarsiaasa isumaqatigiinniutigineqartarnerat KANUKOKA-mit ataatsimoortumik tigummineqassasoq.
KANUKOKA-p siunissaa oqallisigineqalerpoq, Kommuneqarfik Sermersooq ukiup nikinnerani kommunit kattuffiannit ilaasortaajunnaarmat.
- Kommunit piumammassuk KANUKOKA ataatsimoortoq nukittooq sanngiillinngitsoq ingerlateqqinneqassasoq kommunit arlaat peeraluarpalluunniit, Palle Jeremiassen oqarpoq.
Nuunnissamut periarfissat
KANUKOKA-p allaffeqarfia illoqarfinnut allanut nuunneqassappat Palle Jeremiassen ima siunnersuuteqarpoq:
- Nuunneqarsinnaaneranut arlalinnik periarfissaqarpoq, Maniitsoq, Aasiaat, Nanortalik, KANUKOKA-p allaffeqarfia illoqarfinni angisuuniittariaqanngilaq, periarfissat allat tamarmik ammapput, Palle Jeremiassen oqarpoq.
KANUKOKA-mit aallartitat kommuninit pingasunit aallartitat immikkut ittumik ataatsimeersuarnermi sapaatip akunnerata tulliani pingasunngornermi pisussami KANUKOKA sumiffimmi ataatsimi imaluuunniit immikkoortunut pingasunut aggulunneqassanersoq aalajangiiffigineqassaaq.
- Kommuninit aallartitat aalajangissavaat qanoq isikkoqassanersoq, neriuppunga KANUKOKA-p ataatsimoortuunissaanik isummertoqassaaq, KANUKOKA-mi siulittaasoq Palle Jeremiassen oqarpoq.