IA: Illersornissamut isumaqatigiissusioqqittariaqarpugut

Amerikamiut suliffeqarfiutaata Exelis Servicesip Pituffimmi kiffartuussisussatut inissisimaannarnissaanut USA-mi eqqartuussiviit ilaata aalajangernera tusareerlugu, Inuit Ataqatigiit taama qisuariarput

- Kiffartuussinissamik isumaqatigiissutit taamaallaat isumalluutigissallugit naammanngitsut, Inuit Ataqatigiinniit isumaqarpugut. Taamaammat illersornissamut isumaqatigiissutit Nunatta, Danmarkip USA-llu akornanni isumaqatigiissutaasut qimerlooqqinneqartariaqarput isumaqatiginninniutigineqaqqittariaqarlutillu, Inuit Ataqatigiit siulittaasuat Sara Olsvig oqarpoq, imalu nangilluni;

- Kiffartuussinissamik isumaqatigiissummi erseqqissumik massakkut takusinnaavarput nunatsinnut qanoq iluaqutaatiginersoq. Allanngorartorujussuuvoq, Pituffiullu atorneqarnera allanngornikuummat, inuttaqarnera annikillinikuulluni, tassa nunatsinnut praktikkerfissatigut akileraarutitigullu iluaqutaanera annikillinikuugami. Taamaammaat uuma pisup erseqqissumik takutippaa illersornissamut isumaqatigiissut isumaqatiginninniutigineqaqqittariaqartoq, Inuit Ataqatigiit siulittaasuat Sara Olsvig KNR-imut oqarpoq. 

Aamma atuaruk Pituffik pillugu suliaq aalajangiiffigineqartoq