Politikki

IA Folketingemi: Siumut tatigiunnaarparput

Sapaatit akunnerisa aappaat affarlu Folketingimeereerlutik Siumut aamma Inuit Ataqatigiit akornanni tatigeqatigiinneq annikillivoq. Siulittaasup tulliatut Chemnitz Larsen ingiarlugu Hammond siulittaasumut tullinngormat. Siunertat ajunngeqaat, Nunatsinni folketingimut ilaasortanngorlaat Aaja Chemnitz Larsen, Inuit Ataqatigiit aamma Aleqa Hammond, Siumut, qinersinerup unnukkuani assammimmata.

Allattoq Helle Nørrelund Sørensen

juulip 01-at 2015 07:00

Nutserisoq Erna Lynge

Maannali sapaatit akunneri marlungajaat qaangiuttullu tatigeqatigiinneq allanngoreerpoq. Taama pisoqarpoq Aleqa Hammond suleqatigisartik Socialdemokratit ikiorsiullugit Nunatsinnut ataatsimiititaliami siulittaasup tullinngormat.

Taasinerit amerlassusaat naapertorlugit taanna Inuit Ataqatigiinneersumut tuttussaagaluarpoq, 18. juni taakku Siumumit 73-nik amerlanernit taagorneqarmata. Siulittaasup tulliatut inissinnissaq immikkut soqutiginarsisimavoq, talerperliit Grønlandsudvalgimi siulittaasunngortitsimmata.

Aamma atuaruk IA-p Dansk Folkeparti kalaallinik ataqqinninnginnerarpaa

Tamanna pillugu Aaja Chemnitz Larsenip Siumut isornartorsiorpaa.

- Assorsuaq uggornarpoq, tatiginninnermillu pakatsisitsilluni. Assortorneqarsinnaanngilaq suleqatigiinniaraanni tatigeqatigiittariaqarmat. Tamanna attaveqaqatigiinnitsinnut assut uggornarpoq, Socialdemokratinut aamma Siumumut.

Chemnitz Larsen isumaqarpoq Socialdemokratit Hammond siulittaasumut tullinngortikkamikku pissaaneqarnerminni pingaakujunniarsarisut.

Socialdemokratit Hammond tapersersorpaat

Siumumi Aleqa Hammondip isornartorsiuineq tusaatissatut tiguaa.

Erseqqissarpaali politikkikkut taaseqatigiittarnikkullu suleqatigiinnermi partiip ileqqut malissimangai, illuatungiulittut suleqatigiit siulittaasup tullissaatut inissimmanni. Socialdemokratit illuatungiliuttuni annersaapput.

- Tassani suleqatigiinnermi amerlanerussuteqartut ataqqineqartariaqartut, Aleqa Hammond KNR-imut oqarpoq, ilanngullugulu oqarluni suleqatigiinni isiginiarsimagitsik qinersiviup siuliata atuunnerani Inuit Ataqatigiit siulittaasuutitaqarsimammata, maannalu Siumut tullinnguuttoq.

Aamma atuaruk Aajap suleqatigiinnissaq qajannartikkaa

Ataatsimiititaliami siulittaasuutitaqartarneq kalaallit ilaasortaatitaannit marluusunit paarlakaanneqartarsimapput.

Hammond: Suli suleqatigiissinnaavugut

Qinersineqanngitsiartoq Inuit Ataqatigiit siunnersuutigaat Folketingimi kalaallit suleqatigiittariaqartut, tassa kalaallit ilaasortaasut akornanni aaqqissuussamik suleqatigiittoqarnissaa. Ukiuni sisamani kingullerni Johan Lund Olsen IA aamma Doris Jakobsen S suleqatigiissimanngillat.

Taamaattoqalernissaali Aaja Chemnitz Larsen tunngavigalugu ilimanarpallaanngilaq.

- Oqaatigiuaannarsimavara tunngaviatigut nunatta soqutigisaanik aallusserusuttut tamaasa suleqatigerusullugit. Erseqqilluinnartumilli oqaatigisinnaavara uani Nunatta soqutigisai salliutinneqarsimanngimmata, namminerli soqutigisat salliutinneqarsimasut, Siumut eqqarsaatigalugu Chemnitz Larsen taama oqarluni.

Aleqa Hammondilli IA'p suleqatiginissaa suli tunngavissaqarluarsorivaa.

- Oqaannarsinnaavunga: suleqatigiilluarniarta. Naak IA pinnani siulittaasumut tullinngorsimagaluartunga, suleqatigiinnissaq aallunniartigu, Nunatta soqutigisai aallunniartigit ajuallannata. Nukivut kattunniartigit qanorlu Folketingimi Nunarput pillugu suleqatigiilluarsinnaanerluta takullugu, taanna naggasiivoq.