IA Folketingip ukiuata aallartinnginnerani: Danskit naalakkersuisui Naalakkersuisunut apeqqusiinerusariaqarput

"Alaatsinaattoq".

Inuit Ataqatigiit Folketingip Christiansborgimi ukiuani aggersumi taama atuuffeqartussatut imminnut inissipput. Danskillu naalakkersuisui nunatsinnut aamma alaatsinaannerusariaqarput.

Aaja Chemnitz Larsen (IA), Folketingip ukiuanik nutaamik marlunngorpat aallartitseqataasussaq, taama isumaqarpoq.

Danskimmi naalakkersuisui nunatsinni iliuutsinut aningaasaliiffigisimasaminnut akisussaaqataaffigisaminnulluunniit apeqqusiinngippallaartut, IA-meersoq isumaqarpoq.

AAMMA ATUARUK Kalaallit meerartaasa aningaasaliiffigineqarnerat nunatta Folketingimi ilaasortaatitaasa nuannaarutigaat

Taassuma danskit naalakkersuisui meeqqanut inuusuttunullu 100 millionit koruuninik suliniutinut ukioq 2023 ilanngullugu aningaasaliisimasut apeqqusiinngippallaarsorai.

Inatsisartuni illua tungiliuttut Naalakkersuisut Danmarkimut ikioqqunisaannik kimigiisermata tamanna pivoq, naak isumaginninneq nunatta nammineq 1980-imili akisussaaffigilereeraa.

Aningaasalli taakkua kukkusumik atorneqartut, Aaja Chemnitz Larsen isumaqarpoq.

- Suliniutit aallarnisarneqareersut ilarpassui aaqqiipallanneruallaaqaat. Assersuutigalugu meeqqat ornittagassaannik pilersitsigutta, angajooqqaat sapaatit akunnerisa naanerini erngukkaangata meeqqat sumiginnagaanissaannik pinaveersimatitsisannginnitsinnik nassuerutaavoq.

AAMMA ATUARUK Meeqqat inuusuttullu akissarsiffiup nalaani tallimanik ornittagartaalersut

Danskit isumaginninnermut ministeriata Astrid Kragip (S) aamma isumaginninnermut ilaqutariinnullu naalakkersuisup Martha Abelsenip (Siumut) nunatsinni meeqqat inuusuttullu ikiortariallit pillugit suliniuteqaqatigiinnissamut siorna isumaqatigiipput.

Naalakkersuisut danskillu naalakkersuisuisa nunatsinni meeqqat inuusuttullu pillugit pitsaanerusunik suliniuteqarnissamut inassutit 16-it aggustimi saqqummiuppaat.

Inassutinili taakkunani meeqqanut ukioqanngitsuniit marlunnik ukiulinnut tunngatillugu pinaveersaartitsinissamut sammisut ikippallaartut, Aaja Chemnitz Larsen isumaqarpoq.

- Maannamut iliuuserisarsimasatsitut iliuuseqaqqiinnarutta - aammami taamaaliorniarmata - angusagut taakkuuinnassapput.

Taamaammat danskit naalakkersuisui aningaasaliissutitik 100 millionit koruuniusut qanoq atornissaannut piumsaqaateqartariaqarput. 

- Danskit naalakkersuisui suliniutinik sunik aallartitsisimanitsinnik alaatsinaannissaat nakkutiginninnissaallu pingaaruteqarpoq. Immaqaluunniit aningaasaliiissutit naalakkersuisut suliassaqarfimmi akisussaaaffigisaannut sinnaassaataaginnassappat? Aaja Chemnitz Larsen oqarpoq.

AAMMA ATUARUK Danmark øremærker millioner til klimaovervågning og socialområdet i Grønland

Danskillu naalakkersuisui Naalakkersuisut inuit pisinnaatitaaffii pillgit suliaannut aamma apeqqusiinerusariaqartut, IA-meersoq isumaqarpoq.

Danmarkimmi Naalagaaffiit Peqatigiit inuit pisinnaatitaaffii pillugit isumaqatigiissutaat naalagaaffeqatigiittut sinneri sinnerlugit atsiornikuuaa. Isumaqatigiissulli taanna, ilaatigut innarluutilinnut aamma tunngasortaa, nunatsinni tamakkiisumik naapertorneqanngitsoq, Aaja Chemnitz Larsen isumaqarpoq.

Nunatsinni innarluutillit atugaat pitsaanngeqisut, innarluutillit illersuisuata, Tiliup, nalunaarusiaani arlalinni erserpoq.

- Tiliup isornartorsiuinera politikkikkut qisuariarfigineqarnikuunngilaq, Aaja Chemnitz Larsen oqarpoq.

Taamaammat taassuma tamanna danskit naalakkersuisuinut socialdemokraatiusunut Folketingip ukiuani nutaami saqqummiunniarpaa.