Danskit aningaasanut inatsisissaanni nunatsinnut aningaasaliissutit arlaqartut

Naalakkersuisut assigalugit qallunaat naalakkersuisuisa aningaasanut aappaagumut inatsisissamut siunnersuut ippassaq ataasinngornermi saqqummiuppaat.Nunatsinni suliniutinut arlalinnut qallunaat naalakkersuisui aningaasaliinissamut pilersaarput.

Aningaasaliissutit ilaat silap pissusiata allanngoriartorneranut tunngapput.

GC-NET-ip, amerikamiut avataarsualiatitsisarfiata NASA-mit aqutarineqartup, akisussaaffigilernissaa 9,5 millionit koruuninik aappaagumut 2022-mullu aningaasaliiffiginiarneqarpoq.

GC-NET (Greenland Climate Network, tassa Kalaallit Nunaanni silap pissusianut attaveqaat) sermersuarmi silap pissusianut 18-inik misissuisarfeqarpoq.

GC-NET-illu akisussaaffigilerneratigut sermersuarmi silap pissusiata nikerarneranut nalunaarsuineq asseqanngitsoq qulakkeerneqassaaq. Taamaalilluni silap pissusiata allanngoriartorneranut nalunaarsukkat pitsaanerpaat ilisimaneqalissallutik, aningaasanut inatsisissatut siunnersuummi allassimasoq atuarneqarsinnaavoq.

Kinguaassiutitigut atornerluisimasut ikiornissaannut aningaasaliisoqartoq

Qallunaat isumaginninnermut ministeriat Astrid Krag Nuummut tikeraaqqammerpoq. Kinguaassiutitigut atornerluisutut pineqaatissinneqarsimasut ikiorneqarnermikkut inuiaqatigiinnut akuleruteqqinnissaannut pisariaqartitsisoqartoq kalaallit naalakkersuisuisa qallunaallu naalakkersuisuisa suleqatigiissutiginissaat isumaqatigiissutigaat. Suliniummut tassunga 1,9 millionit koruunit aappaagumut immikkoortinneqarput.

Taakkua saniatigut eqqartuussisarnermut inatsisip allanngortinneqarnissaanut 2,7 millionit koruuninik aningaasaliiffigineqarpoq.

Pinerluffigineqarsimasup pinerluttulerinermik suliamut pitsaanerusumik inissisimalernissaa inatsisip allanngortinneqarnissaanut ilaatigut siunertaavoq. Politiit pinerluffigineqarsimasumut taassumaluunniit qanigisaanut suliap ingerlaneranut nalunaaruteqartarnissaannut pisussaaffeqalissapput.