Kalaallit meerartaasa aningaasaliiffigineqarnerat nunatta Folketingimi ilaasortaatitaasa nuannaarutigaat

Nunatsinni meeqqat atornerlugaasimasut ikiorserneqarnissaannut 80 millionit koruunit ukiuni sisamani tulliuttuni aningaasalissutigineqarnissaat Folketingimit pingasunngornermi unnukkut akuersissutigineqarpoq.

Aningaasat taakku Naalakkersuisut danskillu naalakkersuisuisa oktobarimi isumaqatigiissutaannut ilaapput.

Inuit Ataqatigiinneersup Aaja Chemnitz Larsenip aningaasanik immikkoortitsisussanngorneq nuannaarutigaa:

- Nunatsinni meerarpassuarnut inuusuttorpassuarnullu atornerlugaaqqinnissaminnut annilaangasunut aningaasaliinissamik qulakkeerisoqarnera nuannaarutigeqaara, Aaja Chemnitz Larsen oqarpoq, nangillunilu:

AAMMA ATUARUK 80 millionit koruunit kalaallit meerartaannut Folketingimit aningaasaliissutigineqarput

- Taava Naalakkersuisut suleqataalernissaat amigaatigiinnarparput, Aaja Chemnitz Larsen aningaasanut inatsisissatut siunnersuutip Inatsisartunit sisamanngormat oqaluuserineqarnissaa innersuussutigalugu oqarpoq.

Aamma Folketingimi ilaasortap aappaa Siumumeersoq Aki-Matilda Høegh-Dam ilorrisimaarpoq:

- Aningaasat 80 millionit koruunit annertoorujussuupput. Aamma puljeminngaaniit tassanngaaniit danskit isumaqatiginninniarnerannit katillugit 15 procentit missaaniittut kalaallinut toqqaannarlutik tulerput, taamaammat annertoorujussuuvoq. Taamaammat aamma qujamasuutigaara aningaasanik taamatut annertutigisumik tunisisoqalermat. Isumaqarpunga atorluarneqarsinnaasut, Aki-Matilda Høegh Dam taama oqarpoq.