IA Folketingimi: Aaqqissuusseqqinnerit sorsunnermullu peqataanissaq pillugu tusarniaasoqartarnissaa pisariaqarput
CHRISTIANSBORG: Kalaallit Nunaanni aningaasarsiornerup iluani aaqqissuusseqqinnerit, danskit aningaasanut inatsisaannut piumasaqaatit Danmarkillu sorsunnermut peqataanissamik aalajanginnginnerani tusarniarneqaqqaartarnissaq.
Tamakku tassaapput Johan Lund Olsenip Inuit Ataqatigiinneersup Folketingip ullumi sisamanngornermi ammarneqarnerani oqallinnermut peqataagami oqalugiaatimini pingaarnertut qulequtarisai.
Aallaqqaaasiutigalugu Naalakkersuisut maanna tunuartut ukiup aappaa avillugu naalakkersuinikkut ingerlatsinerminni ingerlatsinerliorsimanerat Johan Lund Olsenip isornartorsiorpaa, Nunatsinnilu aningaasarsiornerup iluani aaqqissuusseqqittoqarnissaa pisariaqartoq aamma naqissuserlugu. Aaqqissuusseqqinnerit taakku, novembarip 28-iani qinersinerup kingorna, IA Naalakkersuinngortitsissagaluaruni ingerlakkusukkai aamma oqaatigaa.
Inatsisitigut ataataqanngitsut danskit aningaasanut inatsisaannut ilanngutsikkusukkai
Danskit 2015-imut aningaasanut inatsisissaat ukiaq manna isumaqatigiinniutigalugu naammassineqartussaavoq, tassungalu atatillugu Johan Lund Olsenip erseqqissaatigaa, Kalaallit Nunaanni eqqartuussiveqarneq pinerluttunillu isumaginnittoqarfik danskit aningaasaqarnermut ministeriannik Bjarne Corydonimik (S) isumaqatiginninniarnermi pingaarnertut oqaluuserineqassasut.
Aammattaaq Danmarkimi kalaallit inooqataaniarnikkut ikiortariallit isumaqatiginninniarnerni sammineqassasut kissaatigaa, inunnik isumaginninnermi suliniutinut aningaasaliissutinik ataavartunik immikkoortitsisoqarnissaa IA-mit kissaatigineqarmat. Tamatuma saniatigut aamma inatsisitigut ataataqanngitsut ikiorserneqarnissaat nukittorsaavigineqassasoq kissaatigaa.
IA aamma Danmarkimut assamminik isaassivoq, uuliasiornermut aatsitassarsiornermullu tunngatillugu aningaasaliisartunut suliffeqarfinnullu tunngatillugu 'aalaakkaassuseq pilersinniarlugu periusissioqatigiinnissaq inatsisitigullu sinaakkutissioqatigiinnissaq pingaaruteqartorujussuusoq' oqaatigalugu.
Sorsunnermut peqataanissamik aalajangiisoqartinnagu Kalaallit Nunaat tusarniarneqaqqaassaaq
Naggataatigullu, minnerunngitsumillu, Johan Lund Olsenip Folketingimi ilaasortaqatiminut danskinut eqqaasitsissutigaa Kalaallit Nunaat Savalimmiullu namminerisaminnik inatsisartoqarmata, taakkuli timmisartunik qaartartunik useqartunik Irakiliartitsinissaq pillugu apeqqummi tusarniaavigineqarsimanngitsut. Kalaallit savalimmiormiullu ilaasortaatitaat tusarniaavigeqqaarnagit tamanna Folketingimi sapaatit-akunnerata siuliani aalajangiunneqarpoq.
- Danmarkip Naalagaaffik tamaat sinnerlugu taamatut aalajangiinera – Kalaallit Nunaat Savalimmiullu oqaaseqaammik minnerpaamilluunniit ilanngussaqartinnagit, aaqqissuussinermi kukkuneruvoq. Tamannalu kukkuneruvoq Naalagaaffeqatigiinnerup iluani nunat akornanni pissutsinik ajoqusiisareersoq ajoqusiisinnaasorlu. Aamma ITILLIMI isumaqatigiissummut aker-liuvoq, tassanimi Danmark Kalaallit Nunaallu isumaqatigiikkaluarput aammattaaq apeqqutit pineqartutut ittut pillugit ilisimateqatigiittarniarlutik isumasioqatigiittarniarlutillu, Johan Lund Olsen oqarpoq.
Folketingimut ilaasortaqatini Savalimmiuneersoq Sjúrdur Skaale peqatigalugu, Naalagaaffeqatigiit sorsunnermut peqataanissaat sioqqullugu Folketingimut ilaasortaatitat atlantikup avannaaneersut tusarniaavigeqaqqaartarnissaannik IA siunnersuuteqarniarpoq.
