IA avannaani: Kommuni alla atugarliortittariaqanngilarput
Ane Hansenimmi ernummatigaa, borgmesterit Siumumeersut pingasut siunnersuutaat malillugu, Namminersorlutik Oqartussat suliffeqarfiutaasa kommuuni najugaqarfigisaat naligiissaarinermi pilliuteqarnerulertassappat, tamanna aamma Qaasuitsup Kommunianut sunniuteqarnerlussinnaasoq:
- Soorlu taallattaarneqarpoq, Namminersorlutik Oqartussat suliffeqarfiutaasa sumiiffii aallaavigalugit nammaqataanerusariaqartut.
- Taamatut oqaluttoqassappat annilaangassutigineqarsinnaavoq aamma Qaasuitsup Kommuniata suli annerusumik eqqungaasinnaanera, Ane Hansen, Inuit Ataqatigiit sinnerlugit Qaasuitsup Kommuniani kommunalbestyrelsemi ilaasortaq oqarpoq.
AAMMA ATUARUK Naligiissaarinermut aaqqissuusseqqinnissaq kinguartinneqaqqittoq
Ane Hansenimmi ilaatigut ernummatigaa Royal Greenlandip suliffeqarfiutai arlallit Qaasuitsup Kommunianiimmata, tamanna aamma nalilersuinermi tunngavilersuutigineqarsinnaasoq:
- Tassami tunngaviisa qanoq kinguneqarnissaat aamma qulaajarneqaqqaartariaqarpoq. Pitsaasuunngilaq uagut iluanaarnissarput piinnarlugu kommuuni alla atugarliornissaanut aqqutissiuukkutsigu, Ane Hansen oqarpoq.
Qeqertarsuup Tunuani Inuit Ataqatigiit, sapaatip akunnerata naanerani qaangiuttumi aasaanerani ataatsimeeqatigiikkamik ilaatigut oqariartuutigaat, nuna tamakkerlugu kommunit akornanni naligiissaariinermi kommunimut akileraarutit assigiittariaqaraluartut:
AAMMA ATUARUK Asii Ch. Narup: Akiliinerulernissarput kissaatigineqarmat quarsaarnaqaaq
- Taamaammat uagutsinni angorusunnarnerpaavoq, unneqqarissumik suut tunngavigineqarnersut takusinnaallugit aamma qanoq kinguneqarsinnaaneri tamatsinnut pitsaasumik kingunissalimmik sulinissaq.
- Taamaammanuna uagut innersuussutigigipput nuna tamakkerlugu kommuunit akornanni akileraarutit assigiilertariaqarnerat, Ane Hansen oqarpoq.
Kommunit Siumumeersunik siuttullit pingasut isumaqatigiissutaat malillugu, Kommuneqarfik Sermersooq 117 million koruuninik kommunit akornanni naligiissaarinermi pilliuteqarnerulerulertussaavoq.
