Asii Ch. Narup: Akiliinerulernissarput kissaatigineqarmat quarsaarnaqaaq
Tamatuma kingunerisaanik Kommuneqarfik Sermersooq akiliutigeriikkami qaavatigut 117 million koruuninik aappaagu akiliuteqarnerusussanngorpoq. Kommuneqarfik Sermersuup borgmesteria Asii Chemnitz Narup tupassimaqisoq ima oqarpoq:
- Akiliutigisartakkatta qaavatigut 117 million koruuninik akiliinerusalernissarput borgmesterit allat kissaatigilersimammassuk quarsaarnaqaaq, tupannaqaaq.
Naligiissaarineq ataatsimoortumillu tapiissutit pillugit aaqqissuusseqqinnermi aaqqiissummik aappaagumut atuuttussamik siunnersuut kiisalu aappaaguagumit periusissamik ataavarnerusumik peqalernissaq siunertaralugu piareersarnissamik siunnersuut Aningaasaqarnermut Naalakkersuisup borgmesterillu ulloqeqqata siornatigut isumaqatigiinniutigigaluarpaat, ataatsimiinnerli angusaqarfiunngitsoorpoq.
AAMMA ATUARUK Naligiissaarinermut aaqqissuusseqqinnissaq kinguartinneqaqqittoq
Isumaqatigiinniarnerit ajalusoortut avissaartuuttoqartorlu siunnersuusiortoq ataatsimiisitsisorlu Aningaasaqarnermut Naalakkersuisoq Vittus Qujaukitsoq oqarpoq annerusumillu oqaaseqaqqikkumanani. Naalakkersuisoq ilisimatitsivoq isumaqatigiinniarnerit unimmata taarsiullugu Naalakkersuisut sapaatip-akunnerata tulliani politikkikkut aalajangertussanngortut.
Naligiissaarinermi aaqqissuusseqqinnissami Kommuneqarfik Sermersuup 56 million koruuninik akiliinerusalernissani pillugu ilimasaarutinut aallaqqaammulli akerliulluni sassartaartarsimavoq minnerunngitsumillu kingunissai pillugit innuttaasunut ataatsimiisitsisimalluni.
AAMMA ATUARUK Sermersooq: Nalimmassaaneq annernarsinnaavoq
Asii Chemnitz Narup oqarpoq tamatumuuna 117 million koruuninik akiliuteqarnerunissartik borgmesterinit maanna piumasarineqarmat assut tupigalugu, ilungersornertilli attatiinnassallugu:
-Avataaneersunit sapaatip-akunnerata siuliani uparuarujussuarneqarpugut innuttatsinnik sunniiniaasimasutut allaallu meeqqat, inuusuttut allallu sallunaveeqqutitut tigualerivut uparuarneqarluta. Taama oqariartoriarlutik massakkut marloriaataanik piumasaqalermata paasiuminaappoq, naluara susoqarnersoq.
Kommuneqarfik Sermersuup aningaasaqarnermut ataatsimiititaliaa aqagu ataatsimiissaaq, tassanilu ilaatigut 117 million koruuninik amerlanerusunik piumasaqartoqarnera oqaluuserisassat ilagaat.
