IA ammaqqinnermut: Nunarput ammassanngikkallaraluarpoq

Aqagumiit nunarput avammut ammassaaq.

Oqartussat nunap ammaqqikkiartuaarnerani immikkoortut pingajuannut pinissaq aalajanginngikkallarlugu utaqqeqqilaarsimasussaagaluartut, Inuit Ataqatigiit siulittaasuat, Muté Bourup Egede isumaqarpoq.

Taassuma immikkoortut aappaat aqqusaaqqaarusukkaluarpaa.

- Inuit Ataqatigiinninngaanniit isumatusaarnerpaatut, aammalu innuttaasunik illersuinerpaatut isigingaluarparput ikaarsaariarnerup tullianut tassa ikaarsaariarnerup aappaanut ikaarsaaqqaartariaagaluartugut pingajuannut ingelaqqinnginnermi, Muté Bourup Egede oqarpoq.

AAMMA ATUARUK Nunarput ammaqqilertoq: Nunatsinnut angallanneq sapaatit akunnerata tulliani tamakkiisumik ammassaaq

Taannami naapertorlugu nunatsinni inuit peqqissusaat angalasorpassuarniit pingaaruteqarneruvoq.

Nunarsuullu sinnerani coronavirusi suli siaruaattoq, nunatsinnullu anngunnissaa suli aarlerinaateqartoq taassuma ilanngullugu oqaatigaa.

Sapaatit akunneranut inuit amerlanerpaamik 600-it nunatsinnukarsinnaaneri juunip qeqqani atuutilerpoq.

Ammaqqikkiartuaarnermi immikkoortut aappaat atorsimasuuppat sapaatit akunneranut inuit amerlanerpaamik 1200-it tikissinnaassagaluaput, maannali tamanna qaangiinnarlugu tamanut ammaasoqarpoq.

Muté Bourup Egedellu siusippallaarsoraa.

Atassutip siulittaasuata, Aqqalu Jerimiassenip najoqqutassat apeqquserpai, sakkukinnerusinnaanerarlugit.

Timersorneq imerniartarfiillu

Corona virusimik tunillatsissimasoqangimmat neriniartarfiit imerniartarfiillu killilersuinertaqanngitsumik ammatinneqarsinnaanerat taassuma angorusukkaluarpaa.

- Inuit katersuuffigisinnaasaasa killilersorneqarnerat unitsikkallarneqarsinnaavoq coronartoqannginnerani. Aattuunneq ingerlaqqilissappat, inatsisit taakkua uterteqqineqarsinaasunngortillugit, imaangitsoq atorunnaarsillugit, Aqqalu Jerimiassen oqarpoq.

Muté Borup Egede isumamut tassunga isumaqataavoq, kisianni kulturimut timersornermullu tunngatinnerullugit.

- Kulturikkut aaqqissuussinerit timersornikkullu aaqqissuussinerit, silami ingerlakkajuttartut ingerlannissaannut periarfissat annerutissinnaaneri taanna ammaffigineqarnerusimasinnaagaluarpoq, Mute Bourup Egede oqarpoq.

Ullumikkut illup iluani katersorsinnaanermi amerlanerpaamik inuit 100-juusinnaapput, silamilu 250-usinnaallutik.