IA: Amerikamiut neriorsuutertik eqquutsittariaqarpaat

Tamanna Folketingimi Inuit Ataqatigiinnit isornartorsiorneqarpoq, sullissisussarmi nalunaarsimagaluarpoq kalaallinik qallunaanillu sulisussarsiorniarluni.

Atorfimmummi piumasaqaataasut isumaqatigiissummut naleqquttut, Exelis Services nalunaarpoq.

Amerikami illersornissaqarfiup iluani ilinniangaqarsimaguit imaluunniit tassani misilittagaqarlutit,  timmisartornerullu iluani teknikkimut tunngasunik paasisimasaqarluarlutit, Pituffimmi Assistent Airfield Managerinngorsinnaavutit.

Sulisussarsiornermi piumasaqaatit ilaat tamakkuupput, Pituffimmi sullissisussanngortussap Exelis Service aamma piginneqatigiiffiup pingaarnerusup Vectrusip inuttassarsiuussaani.

Tamanna Inuit Ataqatigiit folketingimi ilaasortaatitaannit Johan Lund Olsenimit isornartorsiorneqarpoq.

- Tassani arlaannik ajortoqarpoq. Vectrus aamma Exelis siusinnerusukkut tusagassiuutinut nalunaarutini tamanullu ammasunik nalunaarutini pingaarnertut oqaatigisarsimavaat, danskinik kalaallinillu sulisoqarniarlutik. Maannakkullu sulisuusut allannguutitaqanngitsumik tigujumaarlugit. Pissutsilli piviusut allatorluinnaq takutitsipput.

Ministeri iliuuseqartariaqartoq

Johan Lund Olsenip maanna nunanut allanut tunngasunut ministeri nalunaajaateqaqquvaa.

- Una pivara, nunanut allanut tunngasunut ministerip aamma eqqaamasariaqarpaa, folketingimi akuersissuteqarsimagatta ima imalimmik: Pituffimmi pingaarnertut danskit kalaallillu sulisorineqassasut. Taamaattumik isumaqarpunga nunanut allanut tunngasunut ministeri iliuuseqartariaqartoq, amerikamiullu piumasaqarfigalugit, neriorsuutiminnik eqquutsitseqqullugit, Johan Lund Olsen oqarpoq.

Kalaallit Nunaat Danmarkilu suli USA-mik isumaqatigiinniarput Exelis Services A/S-ip Pituffimmi sullissinissamik isumaqatigiissutaata sivikillinissaa pillugu.

Isumaqatigiinninniarnerit ingerlanneqarneranni suliffeqarfiup inuttassarsiuussinini unitsittariaqarai Johan Lund Olsen isumaqarpoq.