NunaMineralsip siunissaa ullumi aalajangiiffigineqassaaq
Pigisanik agguaassisarnermut eqqartuussiviup, akiliisinnaajunnaartoqarneranik aalajangiisarfiusup, ingerlatseqatigiiffiup akiliisinnaajunnaarnerata suliarineqarnissaanik pisortatigoortumik nalunaaruteqariarpat, ingerlatseqatigiiffiup pigisani nalillit susinnaajunnaassavai.
Ingerlatseqatigiiffik nalilinnik pigisaqanngippat, ingerlatseqatigiiffik ingerlaannaq matuneqassaaq.
Arlaannilli nalilinnik pigisaqarpat, soorlu assersuutigalugit illuutit, biilit, qarasaasiat imaluunniit aatsitassanik misissuinissamut akuersissutit - taava akiliisinnaajunnaartup pigisaanik aqutsisussamik toqqaasoqassaaq - tassalu eqqartuussissuserisumik - taassumalu ingerlatseqatigiiffiup akiitsoqarfii pigisaalu nalillit naatsorsussavai.
AAMMA ATUARUK NunaMinerals aqagu marlunngornermi eqqartuussisutigoortinneqassaaq
Akiliisinnaajunnaartup pigisaanik aqutsisussamik toqqaasoqariarpat, ingerlatseqatigiiffiup pisortarisaa siulersuisullu sunniuteqarsinnaajunnaassapput, ima paasillugu, ingerlatseqatigiiffik sinnerlugu aalajangiisinnaajunnaarsinneqassallutik.
Taamaammat akiliisinnaajunnaartup pigisaanik aqutsisup ingerlatseqatigiiffik atorunnaarsissavaa imaluunniit tunillugu - ingerlatseqatigiiffiup tunineqarsinnaasunik pigisaqarnera apeqqutaatillugu.
Tunineqarsinnaasunik pigisaqarpat, tunineqarsinnaasut tuniniarneqassapput, isertitarineqartullu akiligassaqarfigineqartunut assigiinngitsunut agguarneqassallutik.
Kalaallit Nunaata aatsitassatigut pisuussutaanik ineriartortitsillunilu atorluaanissamik ingerlatseqatigiiffik siunertaqarpoq, piiaavinnillu piginneqataanermigut, piiaaveqarnikkut royaltiesinik isertitaqarnermigut suliniutinillu tunisaqarnermigut sinneqartooruteqarnissamik aamma siunertaqarluni.
Ingerlatseqatigiiffik 2001-imi ilaannakortumik namminersortunngorsarneqalerpoq ullumikkullu piginneqataassutinik pigisallit arlaqarput, ilaatigut Namminersorlutik Oqartussat, piginneqataassutit amerlanersaannik pigisaqartoq, tassalu 33,7 procentinik pigisaqartuulluni.
Siullertullu akiliisinnaajunnaarnermut atatillugu aningaasartuutit matussuserneqassapput, assersuutigalugu akiliisinnaajunnaartup pigisaanik aqutsisup akissarsiassai.
Tullertut, ingerlatseqatigiiffimmi sulisut akissarsitinneqarsimanngippata taakku matussuserneqassapput.
Tamatuma kingorna allat ingerlatseqatigiiffimmit akiligassaqarfigineqartut - soorlu assersuutigalugit NunaMineralisimut aningaasaliisut aammalu piginneqataassutinik pigisaqartut aningaasanik agguaassiffigineqassapput.
Akiligassaqarfigineqartut aningaasat pissarsiassamik amerlassusaannut uppersaallutik akiliisinnaajunnaarnerup eqqartuussivimmi suliarineqarnerata ulluani piumasaqaateqassapput.