Norgemi aalisartut qilalukkamit qaqortamit qaninngoorneqartut
Qilalugaq qaqortaq nujuitsuugunartoq, Norgemi aalisartunit aniguisinneqarsimavoq. Qilalugaq pineqartoq Ruslandimi tigummineqarsimagunarpoq, Norgemilu aalisartunit piffissami kingullermi siumorneqaqattaarsimalluni.
Aalisartoq Joar Hesten, Norgemi tv-qarfimmut NRK-mut taama ilisimatitsivoq:
- Qassutilersorniarluta qilalugaq umiatsiat akornanniittoq takulerparput. Qanilliartormat takulerparput pituutalersorneqarsimasoq, Joar Hesten oqarpoq.
Qilalugaq qaqortaq sumingaanneernersoq ilisimaneqanngilaq, pituutaanili takuneqarsinnaavoq Ruslandimi St. Petersborgimeersuusoq. NRK taama allaaserisaqarpoq.
Immat pillugit Norgemi ilisimatusarfiup, Tromsømilu ilisimatusarfiup ilimagaat qilalugaq Ruslandimeersuusoq:
- Qilalukkat qaqortat Ruslandimi siornatigut tigummineqarsimasut ilisimavarput, ilaallu aniguisimasut, Audun Rikardsen, Tromsøp universitetianeersoq oqarpoq.
Qilalukkap assiliivilersorneqarsimanissaa ilimagineqarpoq.
Aarluarsuit immap naqqani qaartartunik ujarlersinnaanissaannut Russit illersornissaqarfia Sorsunnerup Nillertup nalaani sungiusaasarsimasoq, aviisip The Guardianip allaaseraa.
Qilalukkat qaqortat, allaallumi puisit aarluarsuillu russit illersornissaqarfianit sungiusartinneqartaleqqissimasut Ruslandimi isiginnaarutitigut 2017-imi ilaatigut aallakaatitassiarineqarpoq.
