Hvideruslandip EU-mi nunanut killeqarfii matusut
Hvideruslandip præsidentiata, Aleksandr Lukasjenkop, Hvideruslandip kimmut nunanut marlunnut Polenimut Litauenimullu killeqarfiit matuai.
Pinngitsaalisaassummik taamaaliortariaqarsimalluni sisamanngornermi unnukkut oqartoq, Hvideruslandimi nutaarsiassaqartitsivik Belta allappoq.
Sakkutuut Ukrainemut killeqarfiup nalaaniittut aamma amerlineqarput.
Hvideruslandimi sakkutuut amerlasuut killeqarfinnik nakkutilliiartortinneqartut, Lukasjenko oqarpoq.
- Sakkutuut aqqusinerninngaanniit peertariaqarpvut, præsidenti oqarpoq.
AAMMA ATUARUK Hvideruslandimi illuatungiliuttut siuttuat Ukrainemut killeqarfimmi tigummigallagaalertoq
Hvideruslandimi præsidentimut qaammatip siuliani qinersisoqareersorlu politikkikkut pissutsit najummassimanartorsiorfiulerput. Hvideruslandilu kitaanit tatisimaneqalersoq, præsident aamma oqarpoq.
Hvideruslandimut killeqarfiup matuneqarsimanera sisamanngornermi unnukkut uppernarsarsinnaasimanagu, Polenimiut naalakkersuisuisa oqaaseqartitaat nutaarsiassaqartitsivimmut Reutersimut oqarpoq.
Killeqarfimmi nakkutilliisoqarfiit nalinginnaasumik ingerlasut, Litauenimi killeqarfiup politiivisa aqutsisuat oqarpoq.
Polen Litauenilu Hvideruslandip præsidentianik sapaatit-akunnerini kingullerni kimigiiserfigivaat.
Assersuutigalugu Lukasjenko atorfilittallu nuimasut allat Estlandimut, Letlandimut Litauenimullu iseqqusaajunnaarsinneqarput.
AAMMA ATUARUK Hvideruslandimi innuttaasut sioorasaarneqaraluarlutik akerliusut
Aleksandr Lukasjenko præsidentimut aggustip ulluisa qulingiluaanni qinersinermi ajugaasuusoq, Hvideruslandip qinersinermut ataatsimiititaliaata ilisimatitsissutigaa. Lukasjenko kisitsisit pisortatigoortut naapertorlugit 80 procentinit taaguunneqarpoq, qinersinermili peqquserluttuliortoqarsimanissaa ilaatigut ilimagineqarpoq.
Hvideruslandimi illuatungiliuttut qinersinermillu nakkutilliisut, qinersinermi peqquserluttuliortoqangaatsiarsimanissaa qularutiginngilaat.