Hvideruslandimi illuatungiliuttut siuttuat Ukrainemut killeqarfimmi tigummigallagaalertoq

Hvideruslandimi illuatungiliuttut akornanni akerliussutsimik takutitsisut siuttuat Maria Kolesnikova, Ukrainemut isilernermini tigummigallagaalerpoq, kingornalu periarfeerunneqarluni. Hvideruslandimi naalagaaffiup tv-qarfia taama nalunaaruteqartoq, nutaarsiassaqartitsivik AFP allappoq.

Maria Kolesnikova, Hvideruslandimi illuatungiliuttut marluk allat peqatigalugit Ukrainemut killeqarfimmut annguttut Ukrainemullu isertut, killeqarfiup politiivisa siusinnerusukkut oqaatigaat.

Hvideruslandimi illuatungiliuttut marluk allat Ukrainemiinnerannik Kolesnikovallu tigummigallagaaneranik tusatsiakkat Hvideruslandimi tv-qarfiup ilumuunnginnerarpai.

Maria Kolesnikova Hvideruslandip illoqarfiisa pingaarnersaanni Minskimi aqqusinermiitsilluni angutinit kiinnaminnik assiaqusersimasunit ataasinngornermi aallarunneqartoq Hvideruslandimi illuatungiliuttut oqaatigaat. Angutit kiinnaminnik assiaqusersimasut Kolesnikova biilinut ikiteriarlugu aallarukkaat illuatungiliuttut oqaatigaat.

AAMMA ATUARUK Hvideruslandimi innuttaasut sioorasaarneqaraluarlutik akerliusut

Arnat pingasut Hvideruslandimi kisermaassilluni ukiorpassuarni præsidentiusimasumut Aleksandr Lukasjenkomut unammillerlutik Hvideruslandimi præsidentimut aggustip ulluisa qulingiluaanni qinersinermi sassarput. 38-inillu ukiulik Maria Kolesnikova arnat taakku akornanni kisiartaalluni Hvideruslandimiippoq, marluk allat nunanut allanut qimaareeramik.

Hvideruslandimi præsidentimut qinersisoqarnerata kingorna akerliussutsimik takutitsinerit imaaginnavissimaput, ilaatigut eqqissiviilliortoqarluni. Aleksandr Lukasjenkomi qinersinermi peqquserluttuliorsimanerarlugu præsidentitut tunuaqquaat.

Inuit 100.000-nit amerlanerusut Minskimi akerliussutsimik sapaatiummat takutitsipput, Hvideruslandimilu inuit katillugit 633-t politiinit tigusarineqarlutik.