Hugo aamma Hans Ole inissiamit ikuallattumik arnamik annaassinerminnik ataqqinaaserneqartut
Angutit marluk Paamiuni politeeqarfimmi ullumi ataqqinaaserneqarput.
Taakku arnaq inissiaqarfimmi Jakob Berthelsens Vejimi inissiamit ikuallattumit septembarip ulluisa aallaqqaataani annaappaat.
Qujanartumik Hugo Geisler Svensson aamma Hans Ole Dahl sukkasimapput.
- Taakku nangaariarnatik arnaq ikuallattumit annippaat kingornalu iterteriarlugu napparsimmaviliaallugu. Arnaq napparsimmavimmi putsumik iigoraasimanerminut nakorsarneqarpoq, Kalaallit Nunaanni Politiit tusagassiuutinut nalunaarummi allapput.
AAMMA ATUARUK Paamiuni katersuiniussaq: Tuppallernaqaaq
Hugo Geisler Svensson aamma Hans Ole Dahl iliuuseqarsimanngikkaluarunik arnaq ajunaarsimasinnaagaluartoq politiit naliliipput.
Inissiaqarfimmi ikuallattoqarnerani inuit pingasut tassa arnaq 61-inik ukiulik angutillu 54-inik 62-illu ukiullit ajunaarput.
Inissiaq sisamanik inittarfeqartoq - quleriaanni siullermiittoq ikuallappoq. Inissiaqarfimmi ikuallattumi inuit ikinnerpaamik 20-upput.
Taakkunannga qassiiusut uutiternitik inissianiillu pissinnerminni ajoqusernitik pissutigalugit napparsimmavimmut unitsinneqarput.
AAMMA ATUARUK Paamiuni ikuallattup pissutaa: Naneruut sikaritsiluunniit ikuallatsitsisimasinnaasoq
Inissiaq ikuallattoqarneranit ajoqusingaatsiarneqarmat inuit tallimat tassani najugaqartut inigisaminniissinnaajunnaarput. Taakku ininut allanut inissinneqarput, taamaakkaluartorli pigisatik ikuallattoqarnerani annaavaat.
Ikuallattoqarnerani pujortarneq naneruutilluunniit ikuallattumut aallarniutaasimasinnaapput.
- Hugo Geisler Svensson aamma Hans Ole Dahl innuttaasoqataasumut pisariaqartitsisumut ikiuunnissinnut qujanarujussuaq. Taakku iliuuseqarnertik pissutigalugu politiinit nersornaammik naleqqulluinnartumik tamarmik immikkut tunineqarput, Kalaallit Nunaanni Politiit sinnerlugit, politimesteri Bjørn Tegner Bay oqarpoq.
