Paamiuni katersuiniussaq: Tuppallernaqaaq
Paamiuni inissiat ilaanni septembarip aallaqqaataani ikuallattoqarmat inuit pingasut ajunaarput arlallillu uutiterlutik napparsimmavimmut unitsinneqarlutik.
Paamiormiu Karl Berthelsen palasi Louis Sigurdsen suleqatigalugu aningaasanik katersinerminni 6.763 koruunit katersorpaat.
- Maannakkut pigisaminnik annaasaqarsimasut tallimat tamaasa 1.275 koruuninik tunisinnaanngorpagut, Karl Berthelsen oqarpoq.
Illorsuaq sisamanik inissiartaqartoq ikuallappoq. Inissiarlu sisamanik sinittarfeqartoq - allermiittoq ikuallalluni.
Inissiaqarfik ikuallammat inuit ikinnerpaamik 20-it najuupput. Taakkunannga qassiiusut uutiteramik inissianiillu pissinnerminni ajoquseramik napparsimmavimmut unitsinneqarput.
Illorsuaq ikuallammat ajoqusingaatsiarmat inuit tallimat tassani najugaqartut inigisaminniissinnaajunnaarput. Taakku ininut allanut inissinneqarput, pigisatilli ikuallannermit annaavaat.
Paamiuni palasip oqarnera naapertorlugu inissiani najugaqartut atisanik oqortunik oqorutinillu amigaateqarput.
AAMMA ATUARUK Paamiuni ikuallattup pissutaa: Naneruut sikaritsiluunniit ikuallatsitsisimasinnaasoq
Tittus Esrassen katersuiniunneqartunut ilaavoq. Tunissutinullu tuppalleqaaq.
- Ilaana tuppalliallannarpoq. Taamatut avatitsinninngaaniit tunissuteqarnerannut qujanaq. Qujasorujussuuvunga, Tittus Esrassen oqarpoq, nangillunilu.
- Tassa eqqarsaatigivara, soorunami arlaatigut atorfissaqartippakka. Immaqa atisat arlaatigulluunniit atorsinnaasannik.
Aningaasat katersat inuttassaannut pingasunngornermi ullaakkut tunniunneqarput, aningaasallumi atorfissaqartinneqarput.
- Ullaarli ilai oqorsaatissaminnik pisiniartut takkuagut, Karl Berthelsen oqarpoq.
Katersuiniarnissammullu isumassarsisoq nuannaaqaaq tupparlerlunilu.
- Assorujusuaq nuannerpoq. Aammali inuiaqatigiit ataatsimut taamannak ikioqatigiissinnaangatta tuppallernarpoq, Karl Berthelsen oqarpoq.
AAMMA ATUARUK Politiit ikuallassimasumik suli misissuisut
Katersuiniarneq ikuallannermi ajunaartut ilisaareermata aallartineqarpoq. Karl Berthelsenip ikuallassimasoq takuinnarlugu katersuiniarnissani aalajangiuppaa.
- Illup sisamanik inissiallip qanoq ikuallassimatiginera qaammarmat takuara. Annertuumillu ikuallassimasoq, suullu amingaataasut takusinnaasimavakka, taamaattumillu katersuiniarneq aallarnersimavara, Karl Berthelsen oqarpoq.
Katersuiniarnermut suliffeqarfiit assigiinngitsut, nunatsinni Danmarkimilu inuit ataasiakkaat aningasat ikisisimapput.
