Hotel Arctimi ineriartortitseqataalluarsimasoq soraarninngortoq
Erik Bjerregaard Ilulissani Hotel Arcticimi ukiuni 26-ni pisortaareerluni tallimanngormat naggataarpoq.
- Aajuna tikittussat allattorsimaffiat pisara. Nalinginnaasumik tikittussat allattorsimaffiat unnukkut tigusarpara. Maannalu takusinnaavara ullumikkut 70-inik nutaanik unnuisoqarniartugut. Ininik qassinik taava atunngitsuuteqalerpugut?
Ullormut suliassat Erik Bjerregaardip sungiusimalluarpai. Ullorli allaaneruvoq, pisortarmi soraarninngortussanngorpoq, ullorlu nallertoq piareersarluarfigisimavaa.
- Siulersuisullu soraarninngornissannut isumaqatigiinnitsinnit ukioq ataaseq eqqarsaatikkut piareersarnissannut periarfissarisimavara. Soraarninngornissara siorna septembarimi oktobarimiluunniit nalunaarutigineqarpoq. Taamaammat piareersarnissannut piffissaqarluarsimavunga.
AAMMA ATUARUK Erik Bjerregaard Hotel Arcticimiit soraarniuteqarpoq
Eqqaamasaqarluarfigaa
Erik Bjerregaardip Hotel Arctic-imi pisortaanerunermini hotelip siorna aningaasaqarnikkut angusarissaarsimanera nuannaarutigalugu soraarninngortussanngorpoq. Akunnittarfimmilu sulinermini pisimasut nuannersut eqqaamasaqarfigai.
- Nuannernerpaalli misigisartakkakka tassaapput ilinniartuutigut allagartartaaraangata. Soorlu igasut, saqisut aamma saaffiginnittarfimmiut aammalu ilaanni allattoqarfimmiugut. Ullut taakku nuannertaqaat.
Ullulli ulapaarfiit aamma unammillernartortaqartarput.
- Qerisoornermi tassani hotelip imermut tankia imaarpoq. Unnuullu siuliani nerersuaqatigiittoqarnikuuvoq. Nerersuaqataasut kusanartunik atikkersorsimasut. Arnallu nujarissarsimallutik. Taakkualu ullaakkut iniminnit ammukarput uffarsimanatik, uatsitullu ullaakkut makikkaangatta nalinginnaasumik isikkorisartakkatta assingatut isikkoqarlutik. Taamani imertartariaqarnikuuvugut unnuisugut ullaakkut kaffiliuunniarlugit.
AAMMA ATUARUK Hotel Arctic aatsaat taama angusarissaartigisoq
AAMMA ATUARUK Hotel Arctic aatsaat taama angusarissaartigisoq
Suli malinnaaffigaa
Naak tallimanngormat naggataaraluarluni akunnittarfimmi piffissami aggersumi susoqassanersoq suli malinnaaffigaa.
- Ukiaru pisussat, naak uanga naammassisussaanngikkaluarlugit takorusulaarpakka.
Erik Bjerregaardip najukkami inuiaqatigiit aallaavigalugit ukiorpassuarni inuussutissarsiummik ingerlataqarsimanera pillugu Inatsisartut Siulittaasoqarfianit sølviusumik 2016-imi nersornaaserneqarpoq.
Erik Bjerregaardilu soraarninngoraluarluni nulianilu Ilulissaniiginnassapput. Morten Nielsenip Erik Bjerregaard Hotel Arcticimi taarserlugu pisortanngussaaq.
