Hotel Arctic aatsaat taama angusarissaartigisoq

Hotel Arctic Ilulissaniittoq, ukiamullu ukiunik 30-nngortorsiorluni nalliuttorsiortussaq, atulernerminiit aatsaat taama siorna unnuisoqartigivoq. Hotelimi takornarianit 10.000-nit sinneqartunit siorna 2013-imi unnuiffigineqarpoq. Taamaalilluni unnuisartut 36 procentimik ukiut marluk ingerlaneranni amerleriarput.

Hotel Arcticip siulersuisuisa ataatsimeersuarneranni hotellip pisortaanerata kisitsisit unnuisartut amerleriarsimanerannut takussutissat saqqummiuppai:

- Takornariat amerliartuinnartut tikittaleramik. Ukiuni kingullerni marlunni amerleriarujussuarput. Uagutsinnut 36 procentimik amerleriarput. Taamaalilluni 2013-mi 10.000-init sinneqartunik takornarianik unnuisoqarpoq. Aatsaallu taama amerlatigisunik unnuisoqarpugut, Hotel Arctic-ip pisortaanera, Erik Bjerregaard, taama oqarpoq.

Taamaalilluni ukioq 2013 Hotel Arcticip ukiuni 30-ani atuunnerani angusarissaarnerpaaffiuvoq:

- Nunami allamiorpassuit nutaat maani illoqarfimmi takusalernikuuagut. Malunnartumillu aamma Asiamiit tikittartut amerlipput. Kinaminngaanniinnaanngistoq, kisianni aamma soorlu Indonisiamiit aamma Thailandimiit. Japanimiut Kalaallit Nunaannut ukiorpassuanngortuni tikittarput. Taakkununngalu arsarnerit qammaasuusarput. Taakkua marsip qaammataani aamma ukiakkut tikeraartorilluartarpagut, hotellip pisortaanera taama oqaluttuarpoq.

Islandimut takornariat Ilulissanut ikaartarnerat Air Greenlandillu Kastrupimiit Kangerlussuarmut ilaasoqarsinnaanerulernera unnuisartut amerlinerannut patsisaaqataalluinnarpoq:

- 3½ tiimiinnaammi atorlugit nunamut kulturimullu allamut tikittoqarsinnaalernikuuvoq. Tamannalu arlalippassuarnit atorluarusunneqartarpoq, illoqarfik manna tikikkuminartoq alakkarusunneqartarluni, Erik Bjerregaard taama oqarpoq.

Hotel Arctic, Air Greenlandimit pigineqartoq, ullumikkut ineeraateqarpoq 85-inik illuaqqallu tallimat:

- Illoqarfik manna tikikkuminartutut nalilerneqartarpoq. Illoqarfik takornarianik sullissinissaminut piareersimavoq. Aamma suleqatigiilluarpugut. Hotelit allat suleqatigilluaannanngilagut aamma takornarianut angallassisartut suleqatigilluarpagut. Taamaattumik takornariat tamaani misigisaqarluarsimallutik aallartarput.

Hotel Arcticip ukiumut naatsorsuutai Air Greenlandip naatsorsuutai marsip qiteqqunnerata missaani saqqummiunneqarpata aatsaat saqqummiunneqassapput.