Hospice-mi toqujartorusuttut Danmarkimut nuuttariaqartarput
Danmarkimi napparsimaviit ajorunnaarsinnaanngitsut toqujartorfigisartagaat hospice-t 18-iupput, tallimanngorpallu oktobarip 12-ani 19-inissaat Svendborgimi ammarneqarluni atulerneqassaaq. Nunatsinni napparsimasut eqqissillutik napparsimavimmi ajorunnaarsinnaanngitsut toqujartorfigisartagaanni hospice-mi toqujartorusuttut Kalaallit Nunaanni tamanna periarfissarinnginnamikku Danmarkimut aallartariqartarput.
Danmarkimi toqujartortut akeqanngitsumik hospice-miissinnaatitaasarput. Ullumilu Inatsisartuni siullermeerlugu Nunatsinni hospice-mit pilersitsisoqassanersoq aammalu ilumut hospice-qalernissaa pisariaqartinneqarnersoq oqallisigineqassaaq.
Danmarkimi Hospice-t aningaasatigut tapersersorneqarput, danskillu naalakkersuisuisa 2011-imi aningaasartuutissanut inatsisaanni hospice-nut inissat 42-unik amerlineqarnissaat aningaasaliiffigivaat, ukiullu pingasut sisamallu ingerlaneranni inissat nutaat taakku pilersinneqassapput.
- Hospice-nut inissat taamaalillutik 2014-imi 250-iulissapput, taama Hospice Forum Danmarkip siulersuisui ukioq manna ataatsimeersuareerlutik nalunaarummi allapput.
Siumut sinnerlugu Inatsisartuni ilaasortap Doris Jakobsen-ip Kalaallit Nunaanni napparsimasunut katsorsarneqarsinnaanngitsunut paaqqutaqarfimmik hospice-mik pisariqartitsisoqarneranik Naalakkesuisunut misissueqqullugit siunnersuuteqarpoq. Atassut sinnerlugu Inatsisartuni ilaasortat Siverth K. Heilmann aamma Knud Kristiansen Kalaallit Nunaanni hospice-mik pilersitsisoqarnissaa aamma siunnersuutigaat.
Sulili nalunarallarpoq ilumut Danmarkimitut napparsimavinnik ajorunnaarsinnaangitsut toqujartorfigisartagaannik hospice-nik Nunatsinni pilersitsisoqassanersoq.Hospice-mik pilersitsinissamik Inatsisartunut siunnersuut itigartivinneqanngilaq. Pisariaqartitsinerulli sukumiisumik misissorneqarnissaa pisariaqartinneqartoq, taama Peqqissutsimut Naalakkersuisup Agathe Fontain akissuteqaammini allappoq.
Hospice-t suunersut qanorlu Danmarkimi ingerlanneqartarnersut paasisaqarfigerusukkukku Hospice Forum Danmark nittartagaatigut uunga http://www.hospiceforum.dk paasisassarsiorsinnaavutit.