Hollandimi unnuakkut aneqqusaajunnaartitsinermut akerliussutsimik takutitsisoqartoq

Hollandimi illoqarfissuup Amsterdamip qiterpasissuani akerliussutsimik sapaammi takutitsisut politiinit avissaartinniarsarineqarmata imermik tissaluttaatit qimmillu atorneqarput.

Innuttaasut oqartussaniit unnukkut nalunaaqutaq qulingiluaniit ullaassakkut tallimanut qiteqqunnerata tungaanut aneqqusaajunnaarsinneqarnerat akerliuffiginiarlugu inuppassuit katersuussimapput.

Inuit 100-nit ikinnerunngitsut akerliussutsimik takutitsinermi ujaqqanik milloorsimanertik qummoroortartunillu politiit tungaannut igeriussisarsimanertik pillugu politiinit tigusarineqarput.

- Killilersuinerit atorunnaarsissigit, akerliussutsimik takutitsisut allagartarsuisuisa ilaanni allaqqavoq.

Akerliussutsimik takutitsisut Amsterdamip qiterpasissuani Museumspleinimik taaguutilimmi katersuussimapput, inuillu katersuussimasut politiinit avissaartinniarsarineqarput. Akerliussutsimimmi takutitsisut qimagunnissamik naalakkerneqarnertik naalakkumasimangilaat.

AAMMA ATUARUK Hollandimi politiit coronamik akiuinermut suliniutinut akerliusut tigusarigaat

Illoqarfimmi Eindhovenimi politiit akerliussutsimillu takutitsisut akornanni aamma aporaattoqarpoq. Politiit akerliussutsimik takutitsisut avissaartinniarlugit gassimik qulliliornartumik tassani atuipput.

Hollandip kujasissortaani illoqarfeeqqami Urkimi coronavirusimut misissuiffik arfininngornermi unnukkut aamma ikuallanneqarpoq.

Hollandimi innuttaasut unnuakkut kingullermik aneqqusaajunnaarmata sorsunnersuaq kingullermi pivoq.