Ukiut 44-t qaangiuttullu Hollandi Eurovision Song Contestimi ajugaasoq

Eurovision Israelimi Tel-Avivimi ingerlanneqarmat Hollandi kingullermik ukiut 44-ut matuma siorna ajugaasimasoq arfininngornermi ajuugaavoq.

Eqqoriaasitsisartut Hollandip ajugaanissaanik siulittuutaat eqquuppoq. Hollandermioq Duncan Laurence arfininngornermi ajugaasutut suaarutigineqarpoq.

Pointit affai agguaanneqareersullu naligiittoqalerpoq, pointillu affai nipilersornermik naliliisartunit  agguaanneqarlutik, naliliisartullu 41-t nunani assigiinngitsuneersuupput.

Nipilersornermik naliliisartut taasinerat malillugu Sverige ajugaasussatut inissisimagaluarpoq tassa Nordmakedoniamut Hollandimullu ajugaalluni, isiginnaartartullu taasinerat allannguilluinnarpoq - Hollandilu ajugaavoq naliliisartullu
ajugaasussatut toqqarsimasaat Sverige normu 6-inngorluni.
Isiginnaartartut taasinerat kisimi aalajangiisuusimassagaluarpat Norge ajugaasimassagaluarpoq, norskit erinarsuutigisaat tuluttut saamisullu erinarsorneqartoq taaguuteqarpoq: 'Spirit in the sky'.

Qallunaat peqataatitaata atugaa, 'Love is forever', Leonoramit erinarsorneqartoq normu 12-itut inissippoq.