Angerlarsimaffeqanngitsut juullisioqatigiinnissaannut peqataaniartorpassuusut
Umiartortullu angerlarsimaffiat taama amerlatigisunut inissaqartitsinani. Aviisi Nuuk Ugeavis taama allaaserisaqarpoq.
Aaqqissuussineq Nuummi Umiartortut Angerlarsimaffianni ukiuni kingullerni marlunni aaqqissuunneqartaraluarpoq, ukioq mannali peqataaniarlutik nalunaartut ima amerlatigipput umiartortut angerlarsimaffianni 80-nut inissaqartumi inissaqartinneqaratik taamaattumik aaqqissuussisut inissamik allamik nassaarniartariaqarput peqataaniarlutik nalunaartut 100-nik sinneqartut juullisioqatigiinnissamut peqataasinnaanissammata.
Angerlarsimaffeqanngitsut juullisioqatigiinnissaannut aaqqissuusseqataasup Nukaaraq Berglundip oqarnera naapertorlugu, inuusuttut angerlarsimaffeqanngitsut amerliartuinnartut ukiuni kingullerni peqataasartut aammali maanna arnartaqartalerlutik.
- Arnat ukiuni siullerni ikittuinnaasaraluarput ukiulli tamaasa amerliartorput, Nukaaraq Berglund aviisimut Nuuk Ugeavisimut taama oqarpoq.
Angerlarsimaffeqanngitsut Nuummi juullisoqatigiinnissaannut nammineq piumassutsiminnik aaqqissuussineq aqqaneq aappaasaa pissaaq.
