Henrik Lund Narsami nalliuttorsiutigineqassaaq
Henrik Lundip toqukkut qimagutinngikkallarami suliai, ullumikkullu inuunermi pisunut sanilliullugit isumasioqatigiittoqassalluni.
Henrik aamma Malene Lundip illuat, Narsap katersugaasivianut ilaasoq, tunissuteqarfigineqassaaq, tassalu Henrik Lundip qalipagai siornatigut saqqummersinneqarsimanngitsut tunniunneqassallutik.
Nipilersorneq erinarsornerlu Henrik Lundip pingaartitarai, taamaattumillu erinarsoqatigiit nipilersortartullu kajumissaarneqarput Henrik Lundip erinniai aallaavigalugit namminneq erinarsuusioqqullugit nipilersugassioqqullugillu, soorluttaaq nipilersuutit allat atorlugit tusarnaagassioqqullugit.
Nipilersoriaaseq rap atorlugu Henrik Lundip erinniaanik nipilersuusiortoqarsinnaasoq Narsap katersugaasiviani aqutsisup Rie Oldenburgip nipilersortartunut kajumissaaruteqarnerminni allapput.
Nalliuttorsiorneq aappaagu septembarip qaammataani aatsaat malunnartinneqartussaagaluartoq, kajumissaaruteqarneq maannangaaq katersugaasivimmit kaammattuutigineqarpoq, Henrik Lundip erinniaanik erinarsoqatigiit nipilersortartullu nutaanik nipilersugassiorlutillu erinarsoqatigiinni erinarsorneqarsinnaasunik isumassarsiulereerniassammata.
