Henrik Leth aalisakkereqqilissaaq
Sulisartut peqatigiiffianni GA`mi, Henrik Leth ukiut sisamat pisortaareerluni nutaanik misilittaanialerpoq. Imaluunniit sungiusimalluakkaminut uternialerpoq, tassami aalisarnermut attuumassutilinnik suliaqaleqqinniarami. Polar Seafoodimummi siulersuisuni siulittaasutut inissinnissaminut akuersivoq.
- Atorfimmi nutaami unammillernartortai soqutiginartillugit akuersivunga, Henrik Leth taama oqarpoq.
Atorfini allanngortissallugu eqqarsaatigingaatsiaqqaarsimavaa, maannakkut atorfini nuannarisorujussuugaluarlugu.
- Polar Seafoodimit unammillernartunik piumaffigineqarpunga, tassani suliffeqarfissuarmi suliniutigineqartussanut aalajangeeqataanissannut periarfissinneqarama, tamannalu akueraara, Henrik Leth nassuiaavoq.
Henrik Leth isumaqarpoq, sukaruttornermini GA qimallugu.
- Peqatigiiffimmi sulileqqaarninnit - ukiuni sisamani atorfeqarninni sorpassuit anguagut, peqatigiiffik ineriartortilluaqalugu, Henrik Leth taama oqarpoq.
Polar Seafoodimi siulersuisuni siulittaasuujutigaluni GA´mi pisortaasoqarsinnaanngilaq, taakku ataatsimoortinneqarsinnaanngimmata. Henrik Leth aamma GA´mi siulersuisut taama isumaqarlutik.
- Aalisarnermut tunngasut assigiinngitsut kattuffimmi suliarisarpagut, taakkulu atorfiit taamasa siulittaasuuffigalugit ataatsimoorunneqarsinnaanngillat, ataasiinnaq tunuliaqutigisariaqarmat, Henrik Leth nassuiaavoq.