Henriette Rasmussen toquvoq

Ilinniartitsisoq tusagassiortorlu Nunatsinni politikkikkut sunniuteqarluarsimasoq Henriette Rasmussen, sivisuumik napparsimareerluni 66-inik ukioqarluni tallimanngormat toquvoq. Ilaqutai taama nalunaaruteqarput.
Assi © : Camilla Dam/KNR
Allattoq Mads Lynge
marsip 05-at 2017 15:32

Henriette Rasmussen 1970-ikkunni inuusuttuulluni arnat pisinnaatitaaffii pillugit sorsuuteqarluni aallartippoq taamanikkut Danmarkimi Inuusuttut ataqatigiinnut ilaasortaalluni, arnat atuagassiaat Kilut peqataaffigisarlugit.

Nuup kommunalbestyrelsiani Inuit Ataqatigiinni siullersaalluni 1983-imi ilaasortanngorpoq. Inuit Ataqatigiillu tunuliaqutaralugit arnani siullersaalluni Inatsisartuni ilaasortanngorluni.

AAMMA ATUARUK Henriette Rasmussen bekymret for litteraturen

Nunap inoqqaavi pillugit sulivoq

1991-imiit 1995-ip tungaanut Inatsisartunut ilaasortaareerluni isumaginninnermut naalakkersuisooreerluni Genevemi ILO-mi 1996-imi ukiut sisamat siunnersortitut sulivoq, nunallu inoqqaavisa pisinnaatitaaffii pillugit aamma sulilluni.

Atorfik taanna kingorna kalaallinut allanut aqqutissiuivoq.

Kingorna kultureqarnermut naalakkersuisooreerluni Atuakkiorfimmi pisortaavoq.

AAMMA ATUARUK Henriette Rasmussen åbner H.C. Andersen-udstilling

Tusagassiortutut sulereerluni KNR raatiumi pisortaavoq kingornalu kultur redaktøriulluni.

AAMMA ATUARUK KNR radio aallakaatitassiornermi pisortartaalerpoq

Henriette Rasmussen toqussi tikillugu ataqqinaammik Frankrigimut aamma konsuliuvoq.

Henriette Rasmussenip qimatarai aappani, ernini, panini ernuttanilu marluk.

Nutartigaq nal. 22:16
Najoqqutarisaq: Dansk Kvindebiografik Leksikon

 

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.

Aamma atuaruk