Helle Thorning: Naalagaaffik kalaallit inuussutissarsiutitigut suliniutaannut aningaasaliissanngilaq
Ministeriuneq Helle Thorning-Schmidt taama oqarpoq, Folketingimi atlantikup avannaaniit ilaasortaatitat ullumi siullermeerlutik ministeriunermut apeqqarissaaqataaneranni.
AAMMA ATUARUK Atlantikup avannaamiut ilaasortaatitaasa ministeriunermut apeqqarissaarnissaat siulleq
Folketingimi apeqqarissaartoqarnerani Nunatta karsia ilungersunartorsiortoq eqqartorneqartunut ilannguppoq.
Siumumit Folketingimut ilaasortaq Doris Jakobsen toqqaannartumik apeqquteqarpoq, Danmark naalagaaffiup aningaasaataanik Kalaallit Nunaani suliffissuaqarnerup aallartisaqqinnissaanut aningaasaliissamaarnersoq:
- Pissutsit atuuttut tunngavigalugit ministeriunermut apeqqutissara tassaavoq, naalakkersuisut kalaallit aningaasaqarnerannut tapiissuteqarnissaminnut qanoq pilersaaruteqarnersut?
- Aamma naalakkersuisut periarfissatut isiginerlugu, naalagaaffiup tungaaninngaanniit Kalaallit Nunaanni inuussutissarsiornerup ineriartortinneqarnissaanut toqqaannartumik aningaasaliissuteqarnissamut?
- Kalaallit Nunaanni Naalakkersuisuusimasut kingulliit marluk politikkerisimavaat, aatsitassarsiornerup ineriartortinneqarnera suliniutillu allat niuvernerpalaartumik ingerlanneqassasut. Taamatullu naalakkersuisuusimasut ersarissumik eqqarsarnerat soorunami maani naalakkersuisut ataqqisimavaat. Oqassaangalu taamatut eqqarsarneq uanga isumaqatigigakku.
Ministeriuneq Helle Thorning-Schmidt akissuteqarpoq.
Danskit tungaannit allatut siunnersuuteqartoqaraluarpoq
Piffissami kingullermi privatinik suliffiutilinnit aamma Dansk Folkepartiimiit siunnersuuteqartoqarsimavoq ilaatigut naalagaaffik peqatigalugu aningaasaateqarfiliortoqassasoq, kalaallit suliffeqarnikkut pilersaarutaannut aningaasaliisussanik.
Ministeriunerli innersuussivoq qallunaat privatit, kalaallillu suliffiutillit Kalaallit Nunaanni aningaasaliisinnaanerannut ataatsimiititaliamut nalunaarusiortussamut.
AAMMA ATUARUK Danmark Pituffik pillugu qanoq isumaqarnersoq IA Siumullu aperipput
Aatsitassarsiornermut assigisaanulluunniit naalagaaffiup aningaasaataanik aningaasaliinissaq naalakkersuisut politikkerinngilaat. Aammattaaq kalaallinut Naalakkersuisuusimasut kingulliit marluk tamanna kissaatigisimanngikkaat sukumiisumik oqalliseqatigisarnerisigut paasivara.
