Atlantikup avannaamiut ilaasortaatitaasa ministeriunermut apeqqarissaarnissaat siulleq
Atlantikup avannaamiut Folketingimut ilaasortaatitaat danskit ministeriunerata Helle Thorning-Schmidtip (S) apeqqarissaarfigineqartarneranut aqagu marlunngornermi decembarip aappaani 2014 siullerpaamik peqataasussanngorput.
Allattoq Simon Uldum -
decembarip 01-at 2014 12:48
Apeqqarissaanermi Johan Lund Olsenip (IA) Greenland Contractorsip Pituffimmi sakkutooqarfimmi kiffartuussinissamik isumaqatigiissummik annaasaqarnera pillugu ilaatigut apeqquteqassamaarpoq.
Taamatut apeqqarissaanermi partiit siuttui maannalu aamma atlantikup avannaamiut ilaasortaatitaat ministeriunermut pisut ingerlasut pillugit piareersaqqaarfiunngitsumik apeqquteqarnissaminnut periarfissinneqarput. Atlantikup avannaamiut ilaasortaatitaat qaammatit pingasukkuutaarlugit taamatut periarfissaqartassapput.
AAMMA ATUARUK Thorning-Schmidtip apeqqarissaarfigineqartarnera nunatsinnit peqataaffigineqartalissasoq
Johan Lund Olsenip Kalaallit Nunaannut tunngasunut oqaaseqartartut Finn Sørensen (EL) aamma Anette Vilhelmsen (SF) peqatigalugit nunanut allanut ministeri Martin Lidegaard (RV) Pituffimmi kiffartuussinissamik isumaqatigiissut pillugu tallimanngorpat decembarip tallimaani isumasiorniarlugu aamma aggersarsimavaat.
