Helle Thorning akiumanngilaq

Nunatsinni suliniutit annertuut pillugit Helle Thorning-Schmidt-ip nangaasunnguamik oqaaseqarfigisarpai, ministerillu sinnerisa assigusumik aamma periuseqarput. Qanittukkummi nunatsinni suliniutit annertuut pillugit inatsisissap Danmarkimut sunniutigisinnaasai Folketingimi ataatsimiititaliani sammineqartussaammata.

Taamaattoqarnissaalumi qularnanngilaq, tassami Folketingip Kalaallit Nunaat pillugu ataatsimiititaliaata Folketingimi siulittaasumut allagaqaasiorsimapput, tassanilu qallunaat naalakkersuisuisa tunngaviusumik apeqqutit kalluartussaaneqarneri pissutaatinneqarlutik ataatsimiititaliat apeqqutaanut ministeriuneq akissuteqarsinnaassanngitsoq tusarliunneqarpoq.

Aamma ministerit allat assigusunik ataatsimiititalianiit aperineqartassagaluarunik akissuteqartarnissaat naatsorsuutigineqassanngitsoq ministeriunerup Folketingimi siulittaasumut allagaani naqissuserneqarsimavortaaq.

Folketingimi suliffeqarnermut, suliffeqarfissuarnut, ineriartortitsinermut, avammut tunisassiornermut, illersornissamut, inatsisit atuutsinneqarnerinut, kiisalu nunanut allanut tunngasunut ataatsimiititaliat apeqquteqaasiussagaluarpata akineqartarnissaat naatsorsuutigineqassanngilaq.

Ministeriunerullumi nunatsinni suliniutit annertuut pillugit apeqqutinut akissuteqarumalersaannginnera Dansk Folkepartiip sakkortuumik isornartorsiorpaa.

Nunatsinnimi suliniutit annertuut pillugit akisussaaffik Namminersorlutik Oqartussat tigoreermassuk ministeriunerup oqaaseqarfigerusunngilaa.

- Taamaammat ministeriunerup akissuteqarusunnginnera pissusissamisuuginnarpoq, Socialdemokratit sinnerlugit Kalaallit Nunaat pillugu ataatsimiititaliami oqaaseqartartoq Flemming Møller Mortensen taama oqarpoq.

- Apeqquterpassuimmi allaat qinngasaarerpalaartutut nipeqartartut Kalaallit isaannik isigissagaanni pisusissamisuunngilluinnarpoq, Flemming Møller Mortensen oqarpoq, illuatungiliuttullu Kalaallit Nunaannut qulangiiniarpalaartutut pissusilersornerarlugit.

- Kalaallit Nunaatami namminersulersimanera paasineqartariaqarpoq ataqqineqarlunilu. Pisulli kingulliit qimerluussagutsigit partiit ilai Kalaallit Nunaannut qangatuut qulangiiniarpalaarlutik pissusilersulersimarpasipput, Flemming Møller Mortensen oqarpoq.

Partiilli Venstre-miut qinngasaariniarsarinnginnerarput.

- Isumaga malillugu uagut apeqquteqaativut Socialdemokratit atuartariaqaraluarpaat. Uagummi Kalaallit Nunaanni inuiaqatigiit pineqarnissaat pimoorullugu ernummatigaarput, Gitte Lillelund Bech, Venstre-p Kalaallit Nunaat pillugu oqaaseqartartua oqarpoq.

Naalakkersuisuttalu siulittaasuata Kuupik Kleistip tusagassiutinut nalunaaruteqarluni qallunaat politikeriisa nunatsinni suliniutit annertuut pilersinniarneqarnerinut akulerussuuteqqajaajuarnerat ajornartorsiutaanerarpaa.

- Danmarkimmi nunanut allamiunut inatsisaata allannguutissamernga allaffissornerinnakkulluunniit iluarsineqarsinnaasoq nalunngilarput, Folketingillu ilaasortaasa isummerfigiinnartussaangaluarpaat, taamaammat Danmarkip iluani pissutsinut taputartuunniarneqarlunilusooq allaat qinngasaarutigineqaqqajaalernera inissaminiinngilaq, Kuupik Kleist taama naggasiivoq.