Hashimik 12 kilomik eqqussisoq: Angut danskeq ukiut arlallit inissiisarfimmiissasoq
![](/sites/default/files/styles/image_934x467/public/article_images/7v9a8639.jpg?itok=bLGAT5wL)
Angut danskiusoq 51-nik ukiulik nunatsinni aqqartartutut inuussutissarsiuteqartoq ukiuni marlunni affarmilu pineqaatissinneqarsimasunut inissiisarfimmiittussanngortinneqarpoq.
Taama Sermersuumi eqqartuussivimmi sisamanngormat aalajangertoqarpoq.
Angutip nassuerutigaa, hashi 12 kilo umiarsuarmut assartuummut Danmarkimiit nunatsinnukartumut ikisaq saviminermut sikaaviusamut saffiorsimallugu, taama nunatsinni politiit tusagassiutinut nalunaarummik allapput.
Tamannalu Århusimi umiarsualivimmi pisimavoq, tamatumalu kingorna namminneq nunatsinnukarpoq umiarsuaq tikippat hashi savimerngup iluaniittoq ammaqqissinnaaniassagamiuk, taamaalillugulu nunatsinni tuniniarlugu, angulli taanna taamak angusaqartiginngitsoorpoq.
- Savimineq sikaaviusaq umiarsuup qaanut qaqinneqarmat qaatungaa pasitsaanneqarpoq politiinullu kalerriutigineqarluni, politiillu takkukkasuarmata angut 51-nik ukiulik aqqartartoq danskiusoq ingerlaannaq paasigasuarneqarpoq, taannalu kingorna hashimik eqqusseriaraluarsimasutut unnerluutigineqarpoq, politiit allapput.
Eqqartuussineq iluarisimaaraa
Eqqartuussineq unnerluussisuusumit Cecilie Stürup Sørensenimit ingerlanneqarpoq taannalu suliap inerneranik iluarisimaarinnippoq.
- Hashi annertoorujussuaq pikkorilluinnarluni aaqqissuulluaqqissaakkamillu Kalaallit Nunaanut eqquteriaraluarneqarpat taava tamanna pinerluttuliornerujussuuvoq, taanna oqarpoq.
Erseqqissaatigineqarporlu angut nassueraluarpalluunniit unnerluussisussaatitaasuniit pinerlineq taamaattoq qajassuunneqarnavianngitsoq.