Hashi pillugu suliami eqqartuussivimmi aalajangiinissaq kinguartinneqartoq
Eqqartuussivimmi suliami inuit arfineq-marluk nunatsinnut hashimik angiortumik eqqussuisimasutut tuniniaasimasutullu unnerluutigineqarneranni unnerluussisussaatitaasut illersuisullu naggataarutaasumik tunngavilersuuteqarnissaat juunip 23-anut 24-anullu kinguartinneqarpoq. Tamanna sapaatip akunnerani uani marlunngornermi aallartittussaagaluarpoq.
Eqqartuussivimmi suliami unnerluussisussaatitaasuuneq, unnerluussisussaatitaasuneersoq Tobias Berg, KNR-imut tamanna ilisimatitsivoq.
AAMMA ATUARUK Pineqaatissinneqarsimasunut inissiisarfiit hashi pillugu suliamit tatineqartut
Taassuma kinguartitsineq assigiinngitsunik pissutissaqarnerarpaa; assersuutigalugu illersuisup aalajangeeqqusinermik qinnuteqaaataa, Nunatta Eqqartuussiviani aalajangiiffigineqartussaq, unnerluussut kalaallisuunngorlugu nutserrinermut naleqqussagassaasoq kiisalu ilisimannittutut nassuiaateqartitsinermut apeqqut illuatungeriit utaqqivaat.
Tamatuma saniatigut illuatungeriit tamarmik peqataaffigisinnaasaannik piffissaliiniarneq ajornakusoorpoq. Taamaammat sapaatip akunnerata naaneranut juunip 23-anut 24-anullu inissinneqarpoq. Taamaalillunilu siusinnerpaamik juunip naanerani aatsaat eqqartuussisoqarsinnaassaaq.
Unnerluutigineqartut arfineq marluusut suli tigummigallarneqarput.
AAMMA ATUARUK Aningaasanik nuussisarnerit eqqumiitsut hashi pillugu suliamik aallarniisuupput