Hashi annertooq pillugu eqqartuusisoqalerpoq
Ataasinngorneq apriilip 16-iani nunatta oqaluttuarisaanerani hashimik anngiortumik eqqussuisumanerit annersaat ilaat nunatta eqqartuussiviani suliarineqalissaaq. Matumuunali innuttaasut tamarmik eqqartuussinermi malinnaasinnaalissapput, siornami suliap ingerlanneqaleruttornerani eqqartuussinerit matoqqasuutinneqartarput, tassani suliaq suli ingerlanneqarnera pissutaatinneqarluni.
Inuit suliami unnerluunneqartut siorna 2017-imi juulip 24-ianili tigusarineqaramilli ulloq manna tikillugu parnaarussaaqqajuarput.
Angutit arfinillit hashi katillugu 63 kiiluusoq nunatsinnut anngiortumik eqqussueqataasimasutut eqqartuunneqassapput. Tigusat arfineq aappaat arnaavoq, taannalu hashi 27 kiilumik anngiortumik eqqusseqataasimasutut unnerluunneqassaaq.
AAMMA ATUARUK Hashi pillugu tigusaaqqasut tigummigallarneqarnerat sivitsorneqartoq
Eqqartuunneqartussat angutitaanni tallimat 20-it sinnerlugit ukioqartiterput, ataaseq 30-t sinnerlugit ukioqarluni, arnartaallu 20-t sinnerlugit ukioqartuulluni.
Siorna aasakkut taakku tigusarineqarmata pasisaasut arfineq marluusut hashi 15 kiilumik Danmarkimiit nunatsinnut anngiortumik eqqussueqataasimasutut pasineqarlutik tigusarineqarput. Siornali decembarip ingerlanerani tigummigallarneqarneri sivitsorneqarmata suliaq 2015-imiit aasaq tigusarineqarnissaasa tungaannut hashi suli annertunerusumik eqqussueqataasimasutut pasisaalerput.
Pasineqartut ukiut pingasut qaammatillu qulingiluaniit ukiut tallimat angullugit parnaarussaassutigissagaat Nunatta Politiivini Unnerluussisussaatitaasuisa siunniukkitsik paasissutigaat.
Unnerluunneqartut inuit arfineq marluusut tamarmik unnerluussissutinut pisuunnginnerartuarput.
AAMMA ATUARUK Politiit hasheernianit 4 millionit koruunit arsaarinnissutigigaat
AAMMA ATUARUK Hashimik tuniniaasutut pasineqarlutik tigummigallagaasut arfineq-marluupput
