Politiit hasheernianit 4 millionit koruunit arsaarinnissutigigaat

Politiit hashimik arsaarinnissutigisaat ukiut aappassaannik annertuseriaqqippoq. Nunatsinni Politiit ikiaroornartut pillugit suliat 562-it 2017-imi suliaraat. 

Hashi 70,9 kilo aningaasallu 4,1 millionit koruunit politiinit arsaarinnissutigineqarput. 

Suliat amerlassusaannut hashillu annertussusianut tunngatillugu Nuuk siuttuuvoq. Nuummi suliat 258-iusimapput, hashilu 26 kilo sinnerlugu aningaasallu 164.000 koruunit arsaarinnissutigineqarsimallutik. 

Aningaasat peqquserlunnikkut pissarsiat Kangerlussuarmut aamma apuunneqartarsimapput. Politiimmi 2,2 millionit koruuningajaat hashilu 18,5 kilo Kangerlussuarmi arsaarinnissutigisimavaat. 

Sisimiuni hashi 10 kilo sinnerlugu aningaasallu 460.000 koruunit arsaarinnissutigineqarsimapput, Ilulissanilu hashi 8 kilo sinnerlugu 900.000 koruuningajaallu politiinit arsaarinnissutigineqarlutik. 

Haship saniatigut Nuummi Qasigiannguanilu iisartakkat viagrat katillugit 46-t politiinit aamma arsaarinnissutigineqarsimapput.   

AAMMA ATUARUK Hashi pillugu tigusaaqqasut tigummigallarneqarnerat sivitsorneqartoq

AAMMA ATUARUK Qeqqata meerartai hashimik atornerluinermit eqqugaaqqasut

AAMMA ATUARUK Arnaq inuusuttoq hashimik poortanik 70-inik iioraalluni eqqusseriaraluartoq