Hashimik tuniniaasutut pasineqarlutik tigummigallagaasut arfineq-marluupput
Nuummi tigusarineqartut qulit akornanni arfinillit tigummigallagaapput, angutit tallimat arnarlu ataaseq. Tigummigallagaasut suli 30-liisimanngillat. Taakku inatsit tunngaviusoq naapertorlugu Eqqartuussisoqarfik Sermersuumi ippassaq marlunngornermi killisiorneqarput. Killisiorneqartut killisiorneqareermata eqqartuussisup unnuaq unnuap-qeqqa qaangilaaraa aalajangerpaa taakku sapaatip-akunnerini sisamani tigummigallagaassasut, aggustip ulluisa 22-ata tungaanut.
Tigummigallagaasut akornanni ataatsip taama aalajangiisoqarnera Nunatta Eqqartuussisuuneqarfianut aalajangeqqitassanngortippaa.
Tigusarineqartut aqqanillit akornanni sisamat iperagaapput.
Angut Danmarkimi tigusarineqartoq 30-nik ukioqarpoq, inatsillu tunngaviusoq naapertorlugu ippassaq aamma killisiorneqareerluni tigummigallagassanngortinneqarluni. Taanna piaarnerpaamik Nuummukartinnneqassaaq, eqqartuussisumullu sassartinneqassalluni. Nuummi Politiit taama nalunaaruteqarput.
Politiit suliamut atatillugu suli misissuipput, taamaammallu matoqqasumik killisiuisoqarluni. Tamanna aallaavigalugu politiit annerusumik suli oqaaseqarumanngillat.
