Politikki

Hans Enoksen: Alersit suut atortarnerikka aamma nalunaarutigineqartalissappat?

Inatsisartunut ilaasortat inatsisartuni sulinerup avataani isertitaat tamanut saqqummiunneqartarnissaanik Inatsisartut Siulittaasoqarfiata siunnersuutaa Partii Naleqqap siulittaasuanit Hans Enoksenimit isumaqatigineqanngilaq.

Allattoq Sandra Meinecke, Jaaku Lyberth

marsip 10-at 2015 15:03

- Pissusissamisoortutut isiginngilara inatsisartunut ilaasortaanera pillugu kaasarfimma imaanut allaat qulaajarneqarnissaat, Hans Enoksen oqarpoq.

Inatsisartut siulittaasoqarfiata inatsisissatut siunnersuutaanni tallimangormat saqqummiunneqartumi inatsisartunut ilaasortat aningaasarsiornikkut soqutigisaat tamanut saqqummiunneqanngippata kinguneqartitsisoqartalissaaq partiinut tapiissutit peerneqarsinnaapput - tassalu partiimi ilaasortamut ataatsimut tapiissut 210.00 kr-niusoq peerneqarsinnaavoq.

- Uagut allatulli inuinnaavugut, ilaqutaqarpugut aamma taakkua kalluarneqarneqartussaapput, inunnik malersuisoqaleraangat imaanngaanngitsunik killiffeqartoqartartoq nalunngilarput, Hans Enoksen oqarpoq.

- Pissusissamisuunngilaq inatsisartunut ilaasortaanera piinnarlugu suna tamaat qulaajarneqassappat - naggataatigut immaqa alersut suut atortarnerikka nalunaarutigisussanngorlugit taamaattumik siunnersuut isumaqatiginngilara, Hans Enoksen oqarpoq.

Aamma atuaruk Transparency Greenland: Inatsisissatut siunnersuut malinnaasinnaatitsinerulissaaq

Inatsisartunut ilaasortat soorlu aatsitassarsiorfinni angisuuni piginneqataappata isertitaminnik saqqummiussinissaat Hans Enoksenip isumaqatigisinnaavaa.

- Aatsitassarsiorfinnik piginneqataasut soorunami allaapput, isumaqarpunga ulluinnarni suliat mianerineqartariaqarput, aatsitassarsiorferujussuarnili pigineqataasut isertitaminnik saqqummiunnisinissaat saneqqunneqarsinnaarpasinngilaq, Hans Enoksen oqarpoq.

Taamaattorli inatsisartunut ilaasortat inuussutissarsiuteqarnermini isertitaasa tamanut saqqummiunneqarnissaannut killissaq Partii Naleqqap siulittaasuata akisinnaanngilaq.

Aamma atuaruk Inatsisissatut siunnersuut: Politikerit inuussutissarsiornermi soqutigisatik saqqummiuttalissavaat

Inatsisissatut siunnersuummi - soorlu aamma Naalakkersuisoqatigiinnissamut isumaqatigiissummi allasimasoq ammasuunissamik pissuseqarnissaq - siunnersuutigineqartumut Naalakkersuisut tunuarsimaarput.

Naalakkersuisut siulittaasuat Kim Kielsen ima oqarpoq:

- Naalakkersuisut siunertamut naleqqunnerusorivaat tamatumunnga taarsiullugu Inatsisartuni partiit ilaasortaatitatik kaammattussagaat inuussutissarsiumminnik aningaasaqarnikkullu soqutigisaminnik tamanut saqqummiussinissamut, tassa aningaasatigut pinngitsaaliineq kinguneqaatissiinerlu maleruaqqusanik unioqqutitsisoq kisiat pinnagu allanik eqquisussat atornagit, Kim Kielsen oqarpoq.