Hans Enoksen: Arnat amerlanerusut sunniuteqalernissaat qulakkerusupparput
Naalakkersuisunut ilaasortanngortussani qulini Partii Naleqqameersut marluupput.
Taakkunanilu ataaseq Inatsisartunut qinigaanngilaq.
Kisianni arnat amerlanerusut Partii Naleqqami isummersoqataallutillu sunniuteqarnissaat qulakkeerusukkitsik, siulittaasua, Hans Enoksen oqarpoq.
Partii Naleqqameersunili qinikkat arnartaqanngillat. Taamaammallu siulittaasoq qinigaanngitsumik toqqaasimavoq.-
Arnanik ilaqarnissarput pingartittorujussuuarput. Angutaannaalluta qinigaasaqattaarpugut. Arnat amerlanerusut partiitsinni aamma isummersoqataallutillu sunniuteqarnissaat qulakkeerusupparput.
- Arnarpassuit ajukkunnanngikkaluarlutik tunuarsimaarnerat qaangerusullugu tassuuna ikkussivugut, periarfissaariarmat.
AAMMA ATUARUK Angutit arnanit hunnorujunik amerlanerusut kommunimut qinigassanngortittut
Naalakkersuisoqataalersussat aappaat pillugu Partii Naleqqap siulittaasua Hans Enoksen taama oqarpoq.
Partii Naleqqap qinigassanngortitaani 30-iusuni arnat sisamaapput. Taakkunani ataasiinnarluunniit qinigaanngilaq. Kirsten L. Fencker qinigassanngortinngilaq.
Arnaaninilumi toqqarneqarnermini tunngavilersuutaagaluartoq, Kirsten L. Fenckerip suliassani naammassisinnaassallugit qularutiginngilaa:
- Piginnaasakka qularinngilakka. Aamma kivitsisinnaallunga qularinngilara, Kirsten L. Fencker oqarpoq.
Taanna Ilisimatusarfimmiit suliat aaqqissuunnerannik aqutsinermillu HD-mik qaffasissusilimmik ilinniarsimavoq.
Inatsit tunngaviusussaq pillugu isumalioqatigiisitat allattoqarfianni inmmikkoortoqarfimmi
maannamut pisortaavoq, aammali Peqqinnissamut Naalakkersuisoqarfiup ataani Paarisami sulisuusimalluni.
Naalakkersuisunngulersoq: Qilanaarpunga
Naalakkersuisussatullu Inatsisartunit toqqarneqareeruni, naalakkersuisoqarfissamini suliat ingerlareersut, qanoq pingaarnersiuisoqarsimanersoq, suliallu aningaasatigut qanoq inissisimanersut misissoqqaarniarpaa. Taavalu sulisut aamma naapinnissai qilanaaraa.
Peqqissutsimilli naalakkersuinermik suliaqaleruni naalakkersuisoqarfiit akimorlugit sulinissaq pingaartuutippaa. Tassami peqqinnissamik suliaqarneq Peqqissutsimut Naalakkersuisoqarfimmiinnaq suliassaanngilaq.
AAMMA ATUARUK Pisortat ingerlatsiviisa qassiiusut naligiissitaanermut inatsit malinngikkaat
- Ineqarniarneq, ilinniartitaaneq, suliffeqarneq. Taamaattumik naalakkersuisoqarfiit allat qanimut ataqatigiissaqatigalugit pingaaruteqarluinnarpoq, aamma naalakkersuinikkut.
Hans Enoksenimut uteqqeriarutta, Partii Naleqqap Kirsten L. Fenckerimik toqqaanermini tunngavilersuutaasa ilaat ima oqaatigaa:
- Angutaannaalluni inunnik isumaginninnermut tunngasut allallu eqqarsaatigigaanni angutit misigissusii ilaanni arnat misigissusiinit allaanerusartorujuusut nalunngilagut. Taamaammat arnartaqarnissarput pingaartittorujussuuarput.