Hans Enoksen aamma Kristian Jeremiassen akissummut naammaginninngillat
- Naalakkersuisut manna tikillugu ersarissumik oqariartuutiginikuunngilaat, soorlu qaleralittassat qaqugu amerlineqassanersut. Taamaattumik Naalakkersuisut pilersaarutaat ersarinnerusariaqarput, taamaalilluni inuiaqatigiit nalornisinneqassanngikkaluarmata, Kristian Jeremiassen oqarpoq.
Oqallinneq aallartippoq Hans Enoksenip nittartagaq tusagassiisarfik, Qalorsaq.gl aqqutigalugu sapaatip akunnerata naanerani isornartorsiuinermini, Naalakkersuisunngortitsinermi neriorsuutit ulloq manna tikillugu suli piviusunngortinneqarsiamnngitsut isornartorsiormagit.
Isornartorsiummut tamatumunnga akilluni, Naalakkersuisut siulittaasuat, Aleqa Hammond ippassaq oqarpoq, Naalakkersuisunngortitsinermit suliluunniit ullut 100-t qaangiutinngitsut suna tamaat aaqqillugu pivusunngortitsisoqarnissaanik piumasaqartoqassappat tamanna kukkunerusoq, tassami piffissaqartinneqartariaqarpugut, Aleqa Hammond radioaviisimut ippassaq oqarpoq.
Naalakkersuisut siulittaasorisimasaatalumi, Hans Enoksenip tamanna paasilluarsinnaagaluarpaa.
- Kisiannili, ukiuni kingullerni sisamani illuatungiliuttuunitsinni ataatsimiikkaagatta aalisarnermut tunngasut qineqqusaarutigissallutigit isumaqatigiissutigisarpavut. Maannalu illuatungiliuttuujunnaareeraluarluta suli sulianik aallartittoqannginnera isornartuuvoq, Hans Enoksen oqarpoq.
Aalisarnermut Naalakkersuisoq, Karl Lyberth oqallinnermut akulerulluni tusagassiutinut ullumi nalunaarummini allappoq, Naalakkersuisut aalisartunut atugassarititaasunik pitsanngorsaaniarlutik malittarisassanik allannguiniarlutik sulillutik aallartereeramik aamma nalunaarut, aalisarnermut tunngasoq maannalu atuuttoq, juunip ingerlanerani tusarniaassutigineqarnissaa pillugu sulillutik aallartereeramik.
Inatsisartuni Siumup ilaasortaatitaat allat radioaviisimit paasiniaavigisavut oqarput, oqallinnermi tunngavilersuutaasut illuatungeriinnit saqqummiunneqartut ataatsimut isigalugit pissusissamisuuginnartut. Oqaloqatigisattali oqaatigaat, Naalakkersuisut suliaminnik avammut nalunaaruteqartarneri ersarinnerulaarsinnaagaluartut, taamaalilluni inuiaqatigiit pisunut malinnaanerulissagaluarmata.