Hallemi unnerluussisussaatitaasoq: Toqoraarujussuarnissamik pilersaaruteqarsimagaluarpoq
Tyskit naalagaaffiani unnerluussisup oqarnera naapertorlugu tyskit illoqarfianni Hallemi juutit naalagiartarfiata eqqaani inuit qassiiusut aallaaneqarfigisaani ”toqoraarujussuarnissaq” pilersaarutaasimavoq.
Tyskit naalagaaffiani unnerluussisoq, Peter Frank suliami unnerluussisussaatitaasoq oqartoq, nutaarsiassaqartitsivik AFP sisamanngornermi allaaserisaqarpoq.
- Ippassaq pisoq peqqarniisaarniarneruvoq. Ilisimasavut naapertorlugit unnerluutigineqartoq, Stephan B juutit naalagiartarfiata eqqaani toqoraarujussuarniaraluarpoq, Peter Frank oqarpoq.
AAMMA ATUARUK Tysklandimi saassussisoqarnera inunnit 2200-nit nittartakkakkut isiginnaarneqartoq
Tyskit kansleriata, Angela Merkelip talerperliunerusunit juutinullu qinngarsuisut ingasaassiniat akiorniarlugit atorneqarsinnaasut tamarmik atorneqassasut saassussisoqarnerata kingorna oqaatigaa.
- Akuersaarneqarsinnaanngilluinnarpoq, Angela Merkel sisamanngornermi oqartoq, nutaarsiassaqartitsivik Reuters allappoq.
Marluk toqunneqartut
Pingasunngornermi saassussisoqarnermat inuit marluk toqutaapput marlullu ikilerneqarlutik.
Toqutaasup aappaa juutit naalagiartarfiata eqqaani toqunneqarpoq, toqutaasullu aappaa illoqarfiup neriniartarfiani kebabitortarfiup qanittuani toqunneqarluni, Reuters allappoq.
AAMMA ATUARUK Inuit marluk Tysklandimi juutit naalagiartarfiata siorngani aallaaneqarlutik toqutaasut
Tyskit nunamut namminermut ministeriata, Horst Seehoferip Tyskandip kangiani illoqarfimmi saassussineq juutinut qinngarsuinerunerarpaa.
Tusarfiit oqarnerat naapertorlugu saassussisoq 27-nik ukioqartoq, talerperliuniartunillu ingasaassiniartuneersuusoq, nutaarsiassaqartitsiviup dpa-p allaaseraa.
Tyskillu naalagaaffiani unnerluussisup unnerluutigineqartoq Stephen B.-mik ateqarnerarlugu paasissutissat ilavai.
Tusagassiorfik: Qaartartoq miloriuttagaq iliveqarfimmiittoq
Angutip saassussinerani Hallemi juutit naalagiartarfia saassunniarneqartuusoq juutit inuiaqatigiivisa siuttuata AFP-mut oqaatigaa, naalagiartarfiulli nakkutilliisuisa pinerluttoq isertissimanngilaat.
Juutit nalliuttorsiornerannut atatillugu inuit 70-init 80-inut naalagiartarfimmiipput.
Pinerluuteqartup aallaasersornerata saniatigut juutit iliveqarfiannut qaartartumik miloriuttakkamik miloriussisoqarsimasoq aviisi Bild allaaserisaqarpoq.
Aammattaaq illoqarfimmi juutit naalagiartariata eqqaani qaartartumik nammineq sanaajusumik ilisisoqarsimasoq, dpa allappoq.